Komisioni i Disiplinës në Spanjë mbylli mbledhjen maratonë ditën e sotme dhe që zgjati 7 orë, me diskutime të ashpra për rastin e incidenteve në Valencia, teksa shfajësoi sulmuesin brazilian Vinicus Jr., që në fakt ishte fajtori kryesor që provokoi tifozët valencianë me shenja për dërgim në të dytën. Po kështu Valencia mori dënim të rëndë me mbylljen e një pjese të mirë të stadiumit, sidomos zonës mitike të emërtuar “Mario Kempes”, ku rrinë tifozët ultras dhe nga erdhën fyerjet “Majmun”.
Kurse te Reali i Madridit, të gjithë krah Vinicius Jr., që për të disatën herë u sulmua nga tifozët me fyerje raciste në stadiumet spanjolle. Brazilianit do t’i bëhen nderime nga klubi dhe tifozët “merengues” gjatë dhe pas ndeshjes kundër Rayo Vallecanos, e planifikuar për t’u zhvilluar këtë të mërkurë në “Santiago Bernabeu”.
Mediet në Spanjë njoftojnë se do të zbulohet një pankartë kundër racizmit dhe kulmi do të jetë në minutën e 20-të (numri i fanellës së lojtarit), kur i gjithë stadiumi do të thërrasë emrin e tij dhe do të këndojë kundër intolerancës. Vetë braziliani do të jetë në stadium, por jo në fushë, pasi u përjashtua me karton të kuq në “Mestalla”.
Ndeshjen do ta ndjekë krah presidentit Perez, i cili dëshiron të mbrojë me çdo kusht talentin e tij: Vinicius “meriton të gjithë mbështetjen në këtë moment”.
