Një 27-vjeçar nga Fieri është arrestuar nga Policia e Roskovecit, pasi dyshohet se ka vënë zjarr në banesën e një shtetaseje, me pretendimin se djali i saj i kishte një borxh financiar.
Pas kallëzimit të shtetases M.L., e cila deklaroi se banesa e saj ishte djegur gjatë kohës që nuk ishte në shtëpi, policia nisi menjëherë hetimet për zbardhjen e ngjarjes. Falë veprimeve të shpejta hetimore, u identifikua dhe u arrestua autori i dyshuar, shtetasi Edusjon Zyka.
“Menjëherë pas marrjes së kallëzimit të shtetases M. L., se një person i paidentifikuar i kishte vënë zjarrin banesës së saj, në lagjen nr. 1, gjatë kohës që ajo nuk kishte qenë aty, shërbimet e Stacionit të Policisë Roskovec organizuan punën për zbardhjen e ngjarjes.
Si rezultat i veprimeve të shpejta hetimore të kryera, u bë i mundur identifikimi, kapja dhe vënia në pranga e shtetasit E. Z., 27 vjeç, banues në Fier. 27-vjeçari dyshohet se i ka vënë zjarrin banesës së shtetases M. L., me pretendimin se djali i kësaj shtetaseje i kishte borxh një shumë parash”, njofton policia.
i.b./dita
