Në dosjen e SPAK ka një element që tregon se nuk janë vetëm institucionet shqiptare që kanë dyshuar për të ardhurat e rritura në mënyrë të beftë të Jamarbër Malltezit, por edhe ato gjermane.
Kjo ka dalë si pasojë e kërkesës së vajzës së Argita Berishës, Desarës për të blerë një apartament edhe në Gjermani (në dosje del se ajo jeton në Roterdam në Holandë)
Rezulton se në drejtim të llogarisë në Gjermani janë kryer katër transferta me vlerën 80 mijë euro secila, për periudhën 08-09.2021-14.09.2021 me përshkrimin: “Kalim vajzës për blerje apartamenti Desara Malltezi Rotterdam”.
Në kompjuterin e sekuestruar nga SPAK tek studio Pustina është gjetur dokumenti, në të cilin gjermanët kanë kërkuar sqarim mbi burimin e këtyre të ardhurave.
Në përpjekje për t’ treguar gjermanëve se aq para nuk ishin problem për familjen e tyre, fillimisht është deklaruar se babai i vajzës (Jamarbër Malltezi) ka bërë 55 milionë euro investim dhe ka një fitim 61 milionë euro, duke harruar që duhen prova si ka arritur të bëjë 55 milionë euro.
Pasi u ka shkuar përgjigja se Malltezi ishte ndërtues dhe ortak i Homeplan, vajzës së tij i kërkohet nga nëpunësi gjerman:
“Ne do të donim të merrnin një përgjigje të gjerë dhe të plotë, duke përfshirë provat themelore që tregojnë sesi babai juaj ishte në gjendje të ndërtonte kapitalin përpara se të bëhej aksioner në Homeplan dhe të ishte në gjendje të merrte pjesë në një projekt me vlerë 55 milionë euro”.
Shënimet në shqip mbi materialin gjerman, të cilat dyshohet se janë bërë nga shtetësja A.Pustina, përpiqen të gjejnë rrugë dalje për pyetjet e gjermanëve, pra ta mësojnë vajzën si të përgjigjet.
Vihet re edhe se shumë nga shpjegimet nuk përputhen me ato që kanë ardhur gjatë hetimit. Pasi shtetasi Jamarbër Malltezi të paktën publikisht shfaqet si aksioner në dhjetor të vitit 2018, ndërkohë që vajza e ka paraqitur te gjermanët si përfitues nga kompania që në 2014.
p.c. / dita
