Drejtuesja e Byrosë Kombëtare të Hetimit, Aida Hajnaj tha sot se korrupsioni luftohet me qasje gjithëpërfshirëse dhe theksoi se një nga sfidat e këtij insitucioni është ngritja e kapaciteteve strukturore.
Ajo tha se gjatë viteve 2023-2024, BKH ka referuar 26 raste në SPAK, 19 për korrupsion. Në mbledhjen e Komisionit të Monitorimit të Këshillit të Evropës, e cila zhvillohet në Tiranë, Hajnaj tha se korrupsion dëmton cilësinë e jetës së qytetarëve të një vendi.
“Korrupsioni godet sundimin e ligjit dhe dëmton cilësinë e jetës së qytetarëve, shkatërron shoqërinë dhe çon drejt fenomeneve të rrezikshme, prandaj duhet ta ndalim. Jemi të përkushtuar për të ndërtuar një shtet ligjor, që trajton të gjithë qytetarët si të barabartë përpara ligjit. Askush nuk mund të jetë mbi ligjin dhe vullneti ynë për të ndërtuar shtetin e së drejtës është real”, tha Hajnaj.
“Si drejtuese e Byrosë Kombëtare të Hetimit më duhet të pranoj se ky institucion është një nga sukseset e reformës në drejtësi, rekrutimi për zgjedhjen e drejtorit, rekrutimin e stafit”, u shpreh Hajnaj.
i.b./dita
