Aktivisti Dritan Goxhaj ka folur për mediat pas lirimit nga ambientet e komisariatit ku u shoqërua pas përplasjes para Kuvendit.
Për mediat, Goxhaj mohoi që ai apo protestuesit e tjerë të jenë dhunuar, madje lavdëroi strukturat e Komisariatit ku është shoqëruar, duke thënë se ata u kanë dhënë ujë, telefona për të njoftuar familjarët dhe u kanë lejuar takime.
“Nuk është përdorur dhunë gjatë shoqërimit në polici. Vetëm para parlamentit ka pasur dhunë, në momentin që jemi shoqëruar. Dëmtime nga të shoqëruarit nuk ka. Ne protestojmë për të thënë të vërtetën, por nuk ka pasur dhunë tjetër”, u shpreh ai.
Protestuesit i kanë vizituar në qeli deputetët Agron Shehaj dhe Erald Kapri, ndërsa nuk kanë pranuar që të takoheshin me Avokatin e Popullit.
“Avokatin e Popullit Endri Shabani nuk e pranuam ta takonim dhe kërkuam largimin e tij nga qelia jonë menjëherë”, u shpreh Dritan Goxhaj.
