Një operacion i pazakontë është zhvilluar në spitalin e Canberra, Australi, ku kirurgët kanë hequr nga truri i një pacienteje një krimb 8 centimetra të gjatë, raporton The guardian.
Pacientja 64-vjeçare nga Uellsi i Ri Jugor, u shtrua për herë të parë në spital lokal në fund të janarit të vitit 2021, pasi kishte dhimbje barku dhe diarre për tre javë, të shoqëruar nga një kollë e thatë e vazhdueshme, ethe dhe djersitje gjatë natës.
Deri në vitin 2022, simptomat e saj përfshinin gjithashtu harresën dhe depresionin, duke nxitur një referim në një spital të Canberra. Një rezonancë magnetike të trurit të saj zbuloi anomalitë që kërkonin operacion.
“Neurokirurgët merren rregullisht me infeksione në tru, por ky ishte një zbulim që ndodh një herë në jetë. Askush nuk e priste që ta gjente”, tha mjeku Sanjay Senanayaka.
Zbulimi befasues bëri që një ekip në spital të mblidheshin shpejt për të zbuluar se çfarë lloj krimbi ishte dhe, më e rëndësishmja, të vendosnin për çdo trajtim të mëtejshëm që pacienti mund të kërkojë.
Ophidascaris robertsi është një krimb i rrumbullakët që gjendet zakonisht te pitonët. Pacientja e spitalit të Canberra shënon rastin e parë në botë që paraziti është gjetur te njerëzit. Mësohet se 64-vjeçarja jeton pranë një liqeni ku jetojnë pitonët. Pavarësisht se nuk kishte kontakt të drejtpërdrejtë me gjarpërinj, ajo shpesh mblidhte barëra përreth liqenit për t’i përdorur në gatim.
