FABULË: Shpresojmë që mushka GJKKO të shkelmojë jo vetëm ujqit, por edhe dhelprat

Thonë se kur Perëndia stisi shtetarin, “trimin” e pushtetit dhe gjykatësin iu tha: kam tre qyrke të ndryshme: një veshje si dhelpër, një si ujk dhe një si mushkë. Çfarë veshje do të zgjidhnit?”

Trimi i pushtetit, si më çakmaku nga ata, u hodh i pari dhe i tha: “Më jep qyrkun e ujkut!”.  Shtetari, si dinak, duke buzëqeshur i tha: “Mua më jep atë të dhelprës”. Gjykatësi duke rrotulluar pak kokën iu drejtua “Nuk është aq keq, prandaj më jep lëkurën e mushkës”.

Nga kjo duhet të ketë lindur barceleta që e kanë për zemër italianët:

“Në një luginë  po ecnin bashkë ujku me dhelprën. Pa pritmas dhelprës i tërheq vëmendjen një kafshë sipër në kodër dhe i thotë ujkut: – Shikoje atë kafshën sipër në kodër, nuk po e dalloj mirë, se më duket edhe si gomar edhe si pelë ?!

E zgjidhim kollaj, – i thotë ujku, shkojmë dhe e pyesim. – Mirë, tha dhelpra – por do ta pyesësh ti se ke më shumë shkollë se unë.

Kur  u ngjitën në kodër dhe u afruan tek ajo kafsha, ujku i trimëruar i thotë: – Nuk po të shëmbëllejmë mirë, je gomar apo pelë?

Kafsha mushkë ngre këmbën e pasme dhe i tregon patkoin ujkut: – Lexoje se e ke të shkruar në patkua! Sa afroi ujku kokën tek patkoi, mushka i jep një shkelm sa e la në vend.

Dhelpra ja mbathi me vrap dhe duke fërkuar duartë i thotë vetes – “Shyqyr që nuk kam aq shkollë se do ta kisha ngrënë unë.”

Me siguri kështu thonë edhe vendimmarrësit tanë kur shohin se gjykatat po lakojnë vetëm emrat e “ujqërve” që iu formulonin tenderat dhe iu çonin  dhelprave prenë e gjahut!”

Shpresojmë që GJKKO të ketë veshur tunikën e “Mushkës” me patkonjë në të dyja këmbët e prapme që të shkelmojë në “lule të ballit” jo vetëm “ujqit” por edhe “dhelprat”.

Këta tanët, për të shplarë trurin e njerëzve kanë lozur vazhdimisht rolin e Dhisë me Delen: “Ta Pashë!!”.

Vlash Laçka 

Botuar në rubrikën “Letër Kryeredaktorit”