Prostitucion edhe në burgun e Reçit, ja ‘dy vip-eshat’ që u ‘specializuan’ në qeli me anëtarët e Bajrave

E quajnë veten vip-e dhe kështu i quajnë edhe teveqelët e shtypit rozë, në fakt janë prostituta që kundrejt parave futen edhe në burgje.

Futja e këtyre “vip-eshave” në ambientet e burgjeve shqiptare, me sa duket është kthyer në një ritual të zakonshëm.

Bëhet fjalë për vajza të reja që frekuentojnë emisionet televizive dhe vetë-ekspozohen në rrjetet sociale.

Pas skandalit të publikuar për burgun e Drenovës mes kosovares Ziza Pajaziti dhe të dënuarit me burg përjetë Laert Haxhiu, thuajse e njëjta formë ka ndodhur dhe në burgun e Reçit në Shkodër.

Pikërisht në këtë burg gati dy muaj më parë rezultojnë të kenë hyrë në javë të ndryshme, dy vajza të njohura të “showbizzit” Shqiptar me inicialet A.D dhe R.R, të cilat pasi kanë marrë “takim në dhomë speciale” me një të dënuar që mbahet në burgun e Reçit, janë larguar sërish.

Prezenca e prostitutave në burgun e Reçit, është shënuar dhe në librat e hyrjes dhe daljes së këtij burgu. Ndërsa imazhet e tyre janë fiksuar dhe nga kamerat e sigurisë të instaluara në këtë burg.

Burime pranë burgut të Reçit, thanë për “Ora News” se takimet janë zhvilluar me një nga anëtarët e grupit “Bajri”, që mbahet i izoluar në këtë burg.

Për hyrje e dy vajzave eskortë ka pasur dijeni të plotë shefi i policisë së burgut Dylber Beqiri dhe njëherësh drejtori i këtij burgu, Leonard Mardoda.

Mësohet se ndaj dy zyrtarëve nga ana e Drejtorisë së Përgjithshme të Burgjeve, është marrë masë pezullimi nga detyra dhe pritet të ekzekutohet në ditët në vijim.

Leonard Mardoda, aktualisht ushtron detyrën e Drejtorit të Komanduar në burgun e Reçit. Situata e futjes së femrave eskortë në burgje është kthyer në modë. Ku shpesh herë ato hyjnë duke u maskuar në letra si bashkëshorte të të dënuarve ose kushërira të tyre.

Në tre burgjet e sigurisë së Lartë në Shqipëri, burgun e Korçës, burgun e Burrelit dhe atë të Peqinit, por edhe në paraburgimin 313 në Tiranë, informacionet janë se vajza të ShowBizit në Shqipëri, eskorta nga Kosova, e madje Venezuela dhe deri Bolivia, kanë hyrë për takime speciale me të dënuar me burg përjetë. /Oranews