Fermerët po kthehen me traktorët e tyre sot në Bruksel për të protestuar gjatë Këshillit të Ministrave të Bujqësisë të BE-së.
Më pak se një muaj pas asaj që u përshkrua si një grevë historike e fermave në kryeqytetin belg më 1 shkurt, kur më shumë se 1300 traktorë vërshuan rrugët e lagjes evropiane, sot fermerët po kthehen për të shprehur zemërimin e tyre për mungesën e reagimit nga autoritetet evropiane.
Siç shkruajnë mediat e huaja, demonstrata e sotme do të përfshijë sindikatat bujqësore nga Wallonia dhe Flanders (Belgjika jugore dhe veriore), si dhe fermerë nga Franca, Italia, Spanja, Gjermania dhe Luksemburgu. Protestuesit pritet të takohen në sheshin Schuman, jashtë selisë së Këshillit të BE-së, ku do të mblidhen Ministrat e Bujqësisë.
Ndër kërkesat kryesore të fermerëve, të cilat thonë se ende nuk janë dëgjuar, janë: të ardhura të drejta, ulje e barrës administrative, përfundimi i marrëveshjeve të tregtisë së lirë dhe rritja e buxhetit të Politikës së Përbashkët Bujqësore (CAP) .
Sipas përfaqësuesve të sindikatave të bujqësisë belge, qindra traktorë pritet të vërshojnë edhe sot Brukselin, por nuk pritet të kalojnë pjesëmarrjen e 1 shkurtit. Autoritetet belge nga ana e tyre paralajmërojnë banorët e kryeqytetit për “probleme të mëdha trafiku” dhe i bëjnë thirrje njerëzve të mos përdorin makinë, por metronë për lëvizjet e tyre.
j.l./ dita