Një delegacion i Misionit të Forcave Ajrore të Shteteve të Bashkuara të Amerikës vizituan sot disa familje në fshatin Merhojë të Belshit për ti nderuar në lidhje me ndihmën e jashtëzakonshme që kanë dhanë në vitet e luftës.
Bëhet fjalë për shpëtimin e jetëve të mjekëve e infermierëve amerikanë që ranë në liqenin e Çesties në 8 Nëntor 1943 pasi avioni ushtarak amerikan që po fluturonte drejt Barit bëri ulje të detyruar në këtë zonë pas goditjes nga gjermanët.
Përfaqësia e Misionit të Forcave Ajrore të SHBA u dorëzoi Çertifikatë Nderi, familjeve që u bënë pjesë e kësaj historie të jashtëzakonshme që përgjatë një muaji mikpritën dhe u kujdesën për jetën e shëndetin e dhjetëra infermiereve e mjekëve amerikanë të mbijetuar.
Gjithashtu Delegacioni në fjalë vendosi buqeta me lule në varret e Mesut e Selime Zena që ishin ndër të parët që mbërritën në vendin ku ndodhi tragjedia dhe që bënë gjithçka për shpëtimin dhe sigurinë e jetës së 32 shtetasve amerikanë që i mbijetuan këtij incidenti ajror.
Përfaqësuesit e Misionit të Forcave Ajrore të SHBA e vlerësuan mikpritjen dhe sakrificën e familjeve belshake e cila është një virtut i rëndësishëm i shoqërisë tradicionale shqiptare.
m.b./dita
