FOTO: Nga Bangladeshi dhe Egjipti, Italia sjell emigrantët e parë në Shqipëri

16 emigrantët e mbërritur sot në portin e Shëngjinit me anijen italiane ‘Libra’ kanë nisur me procedurat e përshpejtuara.

Siç shihet dhe në foto, pas ankorimit të anijes, emigrantët kanë zbritur në tokën shqiptare ku po u nënshtrohen procedurave të verifikimit dhe kontrollit në qendrën pritëse. Më pas ata do të transferohen drejt kampit të Gjadrit për procese akomodimi, përpunimi, verifikimi dhe izolimi apo riatdhesimi – siç kanë deklaruar autoritetet.

Në mesin e tyre janë 10 emigrantë nga Bangladeshi dhe 6 nga Egjipti, të cilët janë shpëtuar në det, pas nisjes nga Libia.

Anija me grupin e parë të emigrantëve arriti në portin e Shëngjinit mëngjesin e së mërkurës, duke shënuar fillimin e zbatimit të një plani të diskutueshëm për të përpunuar mijëra kërkesa për strehim jashtë Italisë.

Qeveria italiane ka ngritur dy qendra pritëse në Shqipëri, marrëveshja e parë e këtij lloji, sipas të cilës një vend i Bashkimit Evropian i dërgon emigrantët në një vend që nuk është pjesë e bllokut, në përpjekje për të penguar emigracionin e paligjshëm.

Anija Libra e marinës ushtarake italiane, u ankorua në portin e Shëngjinit me 16 emigrantë meshkuj të cilët u shpëtuan në det të dielën. Dhjetë prej tyre janë nga Bangladeshi dhe 6 nga Egjipti, vende që konsiderohen si të sigurta nga Italia.

Ata do të kontrollohen në Shëngjin dhe më pas do të dërgohen në brendësi të vendit në Gjadër.

Qeveritë e dy vendeve kanë deklaruar se pasi dokumentet e tyre të përpunohen, ata ose do të dërgohen në Itali, nëse përgjigja ndaj kërkesës së tyre për strehim është pozitive, ose do të kthehen në shtëpi, nëse kërkesa e tyre refuzohet.

Zëra kritikë thonë se ata nuk do largohen më nga Shqipëria.

Mjediset në Shëngjin dhe në Gjadër do të mbikëqyren nga personeli italian. Italia ka thënë se vetëm burrat “jo të cenueshëm” që vijnë nga vendet e klasifikuara si të sigurta, do të dërgohen në Shqipëri. Aktualisht janë 21 vende të tilla në listën italiane.

Vitin e kaluar, 56,588 emigrantë mbërritën në Itali nga vetëm katër prej këtyre vendeve: Bangladeshi, Egjipti, Bregu i Fildishtë dhe Tunizia.

Sipas marrëveshjes deri në 36 mijë emigrantë mund të dërgohen për përpunim në territorin shqiptar çdo vit nga Italia, për sa kohë që ata vijnë nga lista e vendeve të sigurta. Për emigrantët nga këto vende ka kufizime të ashpra për përfitimin e azilit.

Marrëveshja pesëvjeçare e nënshkruar nëntorin e kaluar nga kryeministrja italiane Giorgia Meloni dhe kryeministri shqiptar, Edi Rama, është përshëndetur nga disa shtete që, tani duan të veprojnë si Italia.

Marrëveshja u mbështet nga Presidentja e Komisionit Evropian, Ursula von der Leyen, si një shembull i “të menduarit jashtë kutisë” në trajtimin e çështjes së migrimit në Bashkimin Evropian.

Por ajo është kritikuar nga grupet e të drejtave të njeriut si një precedent i rrezikshëm.

Kryeministri Rama thotë se asnjë vend tjetër nuk do të mund të ketë qendra të tilla në Shqipëri, por në të shkuarën ka shumë raste që premtimet publike janë shkelur pasi vëmendja e opinionit mbi zhvillime jo të pëlqyeshme, bie.

Rama tha se e pranoi këtë marrëveshje Shqipëria është mirënjohëse për dhjetëra mijëra shqiptarë që u mirëpritën nga Italia pas rënies së komunizmit në vitin 1991.

j.l./ dita