Presidenti francez Emmanuel Macron, pritet të shpallë të hënën njohjen zyrtare të shtetit palestinez nga Franca.
Megjithatë, ai ka theksuar se lirimi i pengjeve të mbajtura nga Hamasi përbën një parakusht të qartë përpara se të hapim një ambasadë, sipas një interviste të dhënë për rrjetin amerikan të lajmeve CBS, të dielën.
“Kjo është grupi i parë i kushteve dhe kërkesave që do të vendosim në zbatim në kuadër të procesit të paqes. Por, njohja e shtetit palestinez do të shpallet zyrtarisht të hënën, më 22 shtator”, deklaroi Macron.
Presidenti francez iu përgjigj kritikave, veçanërisht nga Shtetet e Bashkuara, se vendimi i tij i shërben Hamasit. “Nuk i përgjigjem pritshmërive të Hamasit”, u shpreh Macron, duke shtuar se Hamasi ka “fiksim shkatërrimin e Izraelit”.
“Por unë njoh legjitimitetin e shumë palestinezëve që kërkojnë një shtet, sepse janë një popull. Ata duan një komb, një shtet, dhe nuk duhet t’i shtyjmë drejt Hamasit”, tha ai.
Sipas kreut të Elizesë, hapi tjetër do të jetë krijimi i një qeverisjeje të besueshme në Rripin e Gazës dhe rindërtimi i këtij territori të shkatërruar, me objektivin përfundimtar të zgjidhjes me dy shtete.
“Kjo do të izolojë Hamasin dhe do t’u japë palestinezëve një të ardhme përtej terrorizmit”, u shpreh Macron.
Presidenti francez kritikoi hapur strategjinë izraelite të shkatërrimit total, duke theksuar se “lufta e gjithanshme nuk e ka mposhtur Hamasin; përkundrazi, i ka sjellë më shumë rekrutë të rinj”.
“Na nevojitet diplomacia për të arritur sigurinë”, shtoi ai, duke theksuar domosdoshmërinë e iniciativave politike nga komuniteti ndërkombëtar.
Lëvizja e Francës vjen pas vendimeve të ngjashme nga Britania, Kanadaja, Portugalia dhe Australia për të njohur shtetin palestinez, si pjesë e presionit në rritje ndërkombëtar ndaj Izraelit për t’i dhënë fund luftës në Gaza.
Organizata e Kombeve të Bashkuara ka përdorur tashmë termin “gjenocid” për situatën në Gaza, ndërkohë që bisedimet për shkëmbimin e pengjeve dhe një armëpushim mbeten pa rezultat, me kryeministrin izraelit Benjamin Netanyahu që deri më tani ka refuzuar çdo skenar të tillë.
j.l./ dita
