Në një seancë maratonë, Gjykata e Posaçme ka shpallur vendimin për anëtarët e grupit kriminal të akuzuar për atentatin ndaj ish-prokurorit Arjan Ndoja dhe Aleksandër Lahos, ngjarje në të cilën humbi jetën shoferi Andi Maloku.
Burime brenda seancës bënë të ditur se Ramazan Rraja, nipi i ish-deputetit socialist Rrahman Rraja, është dënuar me 6 vite burg, ndërsa Genti Ndërjaku ka marrë 5.4 vite, Bashkim Haxhia dhe Endrit Sinani 4.8 vite secili, dhe Julian Pjetri 4.4 vite.
Prokuroria e Posaçme (SPAK) kishte kërkuar një dënim total prej 43 viteve për pesë anëtarët e grupit, të cilët siguruan kushte dhe mjete për kryerjen e atentatit, por dënimi u konvertua me zbritjen e 1/3 për shkak të gjykimit të shkurtuar.
Sipas Prokurorisë, këta individë kanë nisur ndjekjen e Ndojës dhe Lahos që nga gushti i vitit 2019 dhe kanë siguruar armët dhe mjetet e nevojshme për vrasjen.
Përveç dënimeve të mësipërme, grupi kriminal, pas dështimit të atentatit më 1 nëntor 2019, ka siguruar kushte për të kryer vrasje të tjera.
Në lidhje me këtë ngjarje, Redjan Rraja, nipi i ish-deputetit Rrahman Rraja, është dënuar me burg përjetë, ndërsa Ariol Halili është dënuar me 35 vite burg.
i.b./dita
