Gjykata e Lartë britanike pengon dërgimin e azilkërkuesve në Ruanda

Plani i refuzimit të azilit për emigrantët që hyjnë në Britani në rrugë të paligjshme duket se nuk do të funksionojë.

Shkak është lejimi që Gjykata e Lartë britanike i ka dhënë grupeve të interesit dhe avokatëve mbrojtës të të drejtave të emigrantëve, që të apelojnë politikën e qeverisë britanike.

Kjo do të thotë se ata azilantë, që kanë mbërritur në ishull, nuk do mund të dërgohen në Ruanda deri në përfundim të procesit të apelimit, që do kërkojë muaj, ndoshta deri vitin e ardhshëm.

Ishte po kjo gjykatë që e cilësoi të ligjshme muajin e kaluar politikën e debatueshme të qeverise së Rishi Sunak për të dërguar në shtetin afrikan të Ruandës azilantët që kërkojnë azil në Britani.

Në bazë të kësaj skeme të debatueshme të qeverisë aktuale britanike, ata azilantë që mbërrijnë në ishull nga një vend i sigurt, si Shqipëria, apo ata që vijnë me gomone nga Franca përmes ngushticës së La Manshit mes Anglisë dhe Francës, do mund të dërgohen në autoritetet britanike të emigracionit, në Ruanda, mijëra km larg në Afrikën Qendrore për t’ua shqyrtuar kërkesat e tyre për azil. m.b./dita