Nga Suada Xhameta
Ish-zëvendëskryeministrja mbetet nën masën e pezullimit nga ushtrimi i funksioneve, pasi u rrëzua rekursi i saj. Prokuroria ka shtuar dyshimet për korrupsion pasiv dhe pastrim parash, ndërsa ka sekuestruar një vilë në Dhërmi si pjesë të hetimit.
Gjykata e Lartë e Shqipërisë ka rrëzuar rekursin e ish-zëvendëskryeministres Belinda Balluku, duke lënë në fuqi masën e sigurisë “pezullim nga ushtrimi i funksioneve”, ndërsa Prokuroria e Posaçme kundër Korrupsionit dhe Krimit të Organizuar (SPAK) ka zgjeruar hetimet ndaj saj me dyshime të reja për korrupsion dhe pastrim parash.
Sipas vendimit të Kolegjit Penal, rekursi i Ballukut nuk u pranua, duke lënë në fuqi masën e vendosur më herët. Balluku kishte argumentuar se masa e pezullimit ishte bërë pa objekt, pasi ajo nuk ushtron më funksione shtetërore.
SPAK njoftoi se hetimi ndaj Ballukut është zgjeruar për të përfshirë dyshime për veprat penale të “korrupsionit pasiv të personave që ushtrojnë funksione publike” dhe “pastrimit të produkteve të veprës penale”, përveç akuzës ekzistuese për “shkelje të barazisë së pjesëmarrësve në tendera apo ankande publike”.
Në kuadër të hetimit, Gjykata e Posaçme ka pranuar kërkesën e SPAK-ut për sekuestrimin preventiv të një vile dykatëshe në resortin “White Rocks” në Gjilekë të Dhërmiut, me një vlerë kontraktuale prej rreth 145,000 eurosh.
Prokuroria dyshon se pasuria përfaqëson një përfitim të parregullt, të lidhur me një procedurë prokurimi publik të zhvilluar nga Albcontrol sh.a., institucion që drejtohej nga Balluku në periudhën kur, sipas hetuesve, janë kryer veprimet e dyshuara.
Sipas SPAK-ut, hetimi lidhet me tenderin për rikonstruksionin e godinës teknologjike të Albcontrol, me fond limit 88.6 milionë lekë, si dhe me një shtesë kontrate prej mbi 14 milionë lekësh, pa TVSH. Prokurorët pretendojnë se gjatë hartimit të dokumenteve të tenderit dhe zhvillimit të procedurës janë kryer shkelje të legjislacionit të prokurimeve publike, që krijuan avantazh të padrejtë për kompaninë “Eurocol” sh.p.k.
SPAK-u pretendon gjithashtu se favorizimi i operatorit ekonomik ka vijuar edhe gjatë zbatimit të kontratës, përfshirë një parapagim prej 50% të vlerës së saj.
Sipas organit të akuzës, vila e sekuestruar dyshohet të jetë përfitimi i kërkuar dhe i marrë në këmbim të këtij favorizimi. Prokuroria pretendon se janë përdorur kontrata dhe marrëveshje të dyshuara si fiktive, si dhe persona të tretë, për të fshehur pronësinë reale të pasurisë.
SPAK-u tha se gjatë hetimit ka administruar materiale dixhitale, përgjime të kryera me metoda speciale hetimi, analiza të të dhënave telefonike dhe dëshmi të personave që kanë pasur lidhje me administrimin ose përdorimin e vilës.
Balluku u mor zyrtarisht e pandehur në tetor 2025 për akuzën e shkeljes së barazisë në tendera, ndërsa hetimi është zgjeruar më pas për të përfshirë procedura të tjera prokurimi, përfshirë projekte infrastrukturore dhe koncesionare.
Në dhjetor 2025, SPAK-u kërkoi autorizimin e Kuvendit për arrestimin e Ballukut, por shumica parlamentare e rrëzoi kërkesën, duke mos i hapur rrugë vendosjes së një mase arresti.
