Gjykata Kushtetuese ka shpallur të papajtueshëm me Kushtetutën vendimin e Kuvendit të Shqipërisë të datës 16 shtator 2025, i cili ndryshoi Rregulloren e brendshme duke rritur numrin e komisioneve parlamentare nga 8 në 11. Me një vendim unanim për pranimin e kërkesës, trupa gjykuese i ka dhënë të drejtë grupit të deputetëve të pakicës, duke argumentuar se nxitimi i shumicës për të kaluar ndryshimet brenda 24 orëve asgjësoi të drejtën e opozitës për debat dhe vendimmarrje të informuar.
Vendimi i Gjykatës i jep fund një përplasjeje institucionale të nisur që në fillim të legjislaturës së re, kur 30 deputetë të shumicës socialiste propozuan dhe votuan brenda së njëjtës ditë ndryshimin e strukturës së komisioneve.
Beteja kushtetuese dhe argumentet e palëve
Kërkesa në Gjykatën Kushtetuese u depozitua nga jo më pak se një e pesta e deputetëve të Kuvendit, të përfaqësuar nga kryetari i grupit parlamentar të PD-së Gazment Bardhi dhe avokati Marash Logu. Ata argumentuan se vendimmarrja e shpejtë, e futur në rendin e ditës më pak se 24 orë nga zhvillimi i seancës dhe heqja e së drejtës së fjalës nga Kryetari i Kuvendit, përbënte një shkelje të rëndë të të drejtave që burojnë nga statusi i deputetit.
Nga ana tjetër, Kuvendi u mbrojt me argumentin se Rregullorja është një akt i brendshëm organizativ dhe se veprimi i shpejtë diktohej nga nevoja për të miratuar aktet për procesin e integrimit në Bashkimin Evropian. Megjithatë, ky pretendim u rrëzua nga Gjykata pas analizimit të dokumentacionit.
“Fakti që komisionet parlamentare janë konstituuar në datën 24.09.2025, ndërsa ligjet janë miratuar kohë më vonë, nuk e mbështesin prapësimin e Kuvendit, ndaj Gjykata nuk e konsideron të justifikuar nevojën e urgjencës,” vëren Gjykata Kushtetuese në arsyetimin e saj.
Procedura pamundësoi debatin parlamentar
Gjykata theksoi se megjithëse Kuvendi ka autonomi për të rregulluar funksionimin e tij të brendshëm, ky pushtet vetërregullues nuk mund të përdoret për të shtypur zërin e pakicës. Informimi i deputetëve vetëm ditën e seancës plenare i zhveshi ata nga e drejta thelbësore për të përgatitur amendamente dhe për të diskutuar.
“Mënyra e thirrjes së Kuvendit në seancë plenare, si dhe procedura e përshpejtuar e miratimit të ndryshimeve të Rregullores kanë sjellë cenimin e parimit të demokracisë përfaqësuese në drejtim të lirisë së shprehjes së deputetëve të pakicës parlamentare,” theksohet në vendimin përfundimtar.
Në analizën e saj, trupa gjykuese shton një standard të rëndësishëm për jetën parlamentare, duke u shprehur qartë mbi kufijtë e shumicës:
“Pushteti vetërregullues nuk duhet të bëhet premisë që të drejtat e deputetëve të cenohen në atë masë që do të çonte drejtpërdrejt në cenimin e parimit të demokracisë përfaqësuese.”
Për të mos krijuar një ngërç të menjëhershëm në punimet e Parlamentit, Gjykata Kushtetuese ka vendosur që efektet shfuqizuese të këtij vendimi të hyjnë në fuqi 30 ditë pas botimit në Fletoren Zyrtare.
Kjo periudhë tranzitore i lë kohë Kuvendit që të riorganizojë strukturën e komisioneve të tij parlamentare në përputhje të plotë me procedurat e rregullta dhe standardet e kërkuara nga ky vendim për të drejtat e pakicave në parlament.
j.l./ dita
Po sikur parlamenti te mos i marre ne konsiderate keto vendime te gjykates kushtetuese, se deputetet qe perfaqesojne parlamentin jane te zgjedhur me voten demokratike te popullit, ndersa zgjedhja e antareve te gjykates kushtetuese eshte nje emrim adminstrativ? ! Si do veprohet dhe ku qendron shteti demokratik mbi ata qe zgjedh populli apo ata qe emron administrata?! Me duket se ketu do dali nje ngerç demokratik, ose do pranojme shtetin paralel te emruar ose shtetin e demokratik te zgjedhur ! Ne rastin e pare kemi diktature, ne rastin e dyte mendoj demokraci . Si ?
Nuk ka lidhje o ngaterrestar
Gjykata Kishtetuese eshte pushtet gjyqesor prane Kushtetutes dhe qe mbron Kushtetuten. Parlamenti llafazan (me anetare zgjedhur politikisht) eshte politike, dhe ben politike duke bere ligje sipas mideve politike e duke shkelur me kater kembe Kushtetuten.
Na vjen keq por si parlament jeni me poshte Gjykates Kushtetuese ne hierarkine e Republikes.
Nuk eshte ceshtje ngerci. Eshte ceshtje e paramenduar, e koordinuar qe ne thelb per mban permbysje e renditi kushtetuese dhe roloit e kompetence te kuvendit. Ka dy ane – perfshirja e gjyqtareve, pra institution eve te depolitizuara ne politike dhe grusht shteti institucional. Komisione ne kuvend nuk percakton nga kushtetuta, por nga regullorja e funksionit te kuvendit. Ato miratohen sipas nevojes dhe problematikes qe del perpara.