Gjykata Federale në Shtetet e Bashkuara të Amerikës ka ndaluar përpjekjen e administratës Trump për të përjashtuar Universitetin e Harvardit nga programi për studentët e huaj.
Një gjykatë federale në Boston vendosi të premten në favor të Universitetit të Harvardit, duke ndaluar përpjekjen e administratës Trump për t’i hequr këtij institucioni të drejtën për të pritur studentë ndërkombëtarë.
Veprimet e qeverisë amerikane kundër Harvardit kishin krijuar pasiguri për mijëra studiues dhe studentë ndërkombëtarë. Por vendimi i gjykatëses Allison D. Burroughs lejon që Harvardi të vazhdojë të marrë pjesë në Programin e Shkëmbimit për Studentë dhe Vizitorë, të paktën për momentin.
Administrata synonte ta përjashtonte universitetin nga ky program, i cili u jep mundësi rreth 7,000 studentëve dhe të diplomuarve të fundit të Harvardit të studiojnë dhe punojnë ligjërisht në Shtetet e Bashkuara.
Në një vendim paraprak prej tre faqesh, gjykatësja Burroughs urdhëroi që qeveria të ndalojë “zbatimin, fillimin, mirëmbajtjen apo vënien në fuqi” të përpjekjes së Departamentit të Sigurisë Kombëtare për ta larguar Harvardin nga programi për studentët ndërkombëtarë.
Gjithashtu, gjykata urdhëroi që qeveria t’u komunikojë zyrave diplomatike amerikane dhe pikave të hyrjes në vend që të “injorojnë” çdo udhëzim që kufizon pjesëmarrjen e Harvardit në këtë program.
i.b./dita
