Sot gratë në Islandë kanë hyrë në një grevë njëditore për paga të barabarta për burrat dhe gratë dhe për t’i dhënë fund dhunës me bazë gjinore, ndërsa protestës i është bashkuar edhe kryeministrja e këtij vendi, Katrin Jakobsdóttir.
“Ne ende nuk i kemi arritur objektivat tona për barazi të plotë gjinore dhe ende kemi të bëjmë me një hendek pagash me bazë gjinore, i cili është i papranueshëm në vitin 2023”, tha kryeministrja islandez për faqen e lajmeve mbl.is.
Ajo tha se do të qëndrojë në shtëpi sot si pjesë e një proteste për “ditën e pushimit të grave” dhe pret që gratë e tjera në kabinetin e saj të bëjnë të njëjtën gjë, raporton AP.
Organizatorët e protestës u bënë thirrje grave që të refuzojnë punën me pagesë dhe atë të papaguar, përfshirë punën në shtëpi, gjatë grevës së sotme njëditore.
Përfaqësuesit e sektorëve të arsimit dhe shëndetësisë në Islandë, sektorë ku shumica e punonjësve janë gra, thanë se do të goditeshin rëndë nga protesta dhe operatori kombëtar i TV dhe radios i Islandës RUV tha se do të kufizonte transmetimet sot.
Greva e sotme në Islandë është më e madhja që nga 24 tetori 1975, kur 90 për qind e grave refuzuan të punojnë, të pastrojnë apo të kujdesen për fëmijë për të shprehur pakënaqësinë e tyre për diskriminimin në vendin e punës.
