Sekretari Amerikan i Shtetit Anthony Blinken, pas vizitës në Turqi, mbërriti pasditen e së hënës në Athinë ku është takuar n me kreun e qeverisë greke Kyriakos Mitsotakis.
Vend të rëndësishëm kanë zënë në bisedë marrëdhëniet greko-amerikane si dhe çështja e Ukrainës.
“Kjo luftë e paprovokuar ka testuar aleancën tonë, por unë mendoj se ne kemi qenë në gjendje të përgjigjemi në mënyrën më të përshtatshme .Ju e dini që Greqia e ka mbështetur gjithmonë Ukrainën, gjithashtu duke ofruar ndihmë ushtarake. Është shumë e qartë se duhet të dërgojmë një sinjal se çdo formë revizionizmi dhe ndryshimi i kufijve me forcë nuk mund të tolerohet nga bashkësia ndërkombëtare e shteteve demokratike’- tha kryeministri Mitsotakis.
“Jemi tashmë në një vit të agresionit të Rusisë kundër Ukrainës, por partneritetet, aleancat, që kemi krijuar, janë të forta në mbështetje të saj dhe unë duhet të duartrokas lidershipin e Greqisë si ndër të parët që i dhanë mbështetje Ukrainës në atë zonë, për tu rikthyer demokracia e cila po sfidohet nga agresioni rus. Jam këtu edhe për të inauguruar Dialogun e Katërt Strategjik mes vendeve tona, që është një mjet për të forcuar realisht edhe më shumë partneritetin që kemi në baza dypalëshe.”– tha sekretari Blinken.
Blinken ka shkruar në llogarinë e tij në Twitter se është vizita e tij e parë në vendlindjen e demokracisë, teksa ka theksuar se SHBA e shohin Greqinë si një qendër të sigurisë energjetike në rajon, në një moment madje kur marrëdhëniet dypalëshe janë në nivelin më të mirë.
Përveç takimit me homologun e tij Nikos Dhendias mëngjesin e së martës në inagurimin e raundit të 4-të të Dialogut Strategjik Greqi-SHBA dhe konferencës për shtyp, në agjendën e vizitës është përfshirë edhe takimi me kreun e opozitës greke Aleksis Tsipras.
m.b./dita
