Pep Guardiola, i pranishëm në një event në Barcelonë, ku drekoi edhe me presidentin Johan Laporta, ai që e bëri trajner duke i besuar skuadrën një tekniku pa përvojë në vitin 2008, teksa festuan edhe titujt e këtij sezoni (3 City dhe 2 Barcelona). Spanjolli iu përgjigj edhe pyetjeve në lidhje me të ardhmen e tij.
Tekniku mohoi një kalim të mundshëm në krye të katalanasve në të ardhmen, ndërsa theksoi se “blaugranat”kanë Xavi-n dhe mbase sipas tij në të ardhmen mund t’i drejtojë edhe Busquets.
“Barcelona tashmë ka një trajner të madh. Ai fitoi La Ligën dhe shpresoj se do të qëndrojë për shumë vite. Kur Xavi të vendosë të mbyllë etapën e tij aty, ndoshta do të jetë radha e Busquets ose të tjerëve. Ato janë faza. E imja si trajner (e Barcelonës) ka përfunduar“-deklaroi Pep Guardiola.
