Ka hyrë në fuqi kufiri i çmimit të naftës ruse nga deti, i rënë dakord nga Bashkimi Evropian, G7 dhe Australia. Kufiri prej 60 dollarësh për fuçi, i cili hyri në fuqi të hënën, synon të kufizojë aftësinë e Rusisë për të financuar luftën e saj në Ukrainë, duke u siguruar që ajo të vazhdojë të furnizojë tregun global.
Moska, megjithatë, ka thënë se nuk do t’i përmbahet masës edhe nëse duhet të shkurtojë prodhimin. Kufiri vjen në krye të embargos së BE-së për importet e naftës së papërpunuar ruse nga deti dhe premtimeve të ngjashme nga Shtetet e Bashkuara, Kanadaja, Japonia dhe Mbretëria e Bashkuar.
Kjo do të thotë se nafta ruse e shitur vetëm me një çmim të barabartë ose më pak se 60 dollarë për fuçi mund të dërgohet në vendet e palëve të treta duke përdorur cisterna të G7 dhe BE, kompani sigurimesh dhe institucione krediti. Për shkak se firmat kryesore të transportit dhe sigurimit në botë janë të vendosura në vendet e G7, kufiri mund ta bëjë të vështirë për Moskën që të shesë naftën e saj për një çmim më të lartë.
Vendet që nuk miratojnë masën mund të vazhdojnë të blejnë naftën ruse mbi kufirin e çmimit, por pa përdorur shërbimet perëndimore për ta blerë, siguruar ose transportuar atë.
“Ne kemi sinjale të qarta se një numër i ekonomive në zhvillim, veçanërisht në Azi, do të respektojnë parimet e kufirit”, tha një zyrtar evropian për agjencinë e lajmeve AFP, duke shtuar se Rusia tashmë është “nën presion” nga klientët e saj për të ofruar zbritje.
Por Rusia, eksportuesi i dytë më i madh i naftës në botë, tha të dielën se nuk do të pranonte tavanin dhe nuk do të shesë naftë që i nënshtrohet.
j.l./ dita
