Gjykata e Posaçme e Shkallës së Parë vendosi të martën më 15 prill deklarimin fajtor dhe dënimin me 4 vjet burg të Muhamet Manollarit, i akuzuar se i dërgoi një shumë parash të atit në Siri në kohën që ky i fundit ishte bërë pjesë e organizatës terroriste ISIS.
Gjykimi ndaj Manollarit u krye me procedurën e zakonshme, prej nga ai u gjet fajtor për veprën penale “Kryerja e shërbimeve dhe veprimeve me persona të shpallur”, që përcakton se dhënia e fondeve dhe pasurive të tjera personave ndaj të cilëve zbatohen masa kundër financimit të terrorizmit, dënohen me burgim nga katër deri në 10 vjet. Ekzekutimi dënimit kryhet kur vendimi merr formën e prerë.
Prokuroria e Posaçme, SPAK i përfundoi hetimet ndaj Manollarit në mars të vitit të kaluar. Sipas SPAK, babai i të pandehurit Muhamet Manollari, Mehdi Manollariështë larguar në maj të vitit 2013 nga Shqipëria për në Siri, duke u bërë pjesë e organizatës “ISIS”, e listuar si organizatë terroriste nga Këshilli i Sigurimit të Organizatës të Kombeve të Bashkuara. Në nëntor të vitit 2016, Mehdi Manollari është futur në listën kombëtare të personave të shpallur për financim të terrorizmit.
Nga hetimet ka rezultuar se në nëntor të 2018-ës, i pandehuri Muhamet Manollari ka transferuar nëpërmjet një institucioni që ofron shërbime të transfertave monetare shumën prej 864 euro në favor të një shtetasi sirian, me qëllim për t’ia dërguar babait të tij Mehdi Manollari, i cili në atë kohë ndodhej në Siri.
Sipas SPAK, i pandehuri për të dërguar këtë shumë parash, nuk kishte përdorur emrin e tij, por një kartë identiteti në emër të një shtetaseje, e cila e kishte raportuar atë të humbur, kohë para kryerjes së transaksionit. Po ashtu, shuma monetare nuk është dërguar në mënyrë të drejtëpërdrejtë babait të të pandehurit, por një personi tjetër të referuar prej tij./BIRN
