Voltalia, një gjigand ndërkombëtar në energjitë e rinovueshme, njoftoi këtë të hënë fillimin e prodhimit të energjisë nga centrali diellor i Karavastasë, në qarkun e Fierit. Me një kapacitet total prej 140 megavat, termocentrali i Karavastasë mund të prodhojë energji elektrike të barabartë me konsumin e 220,000 njerëzve.
I gjithë kapaciteti i termocentralit sigurohet nga kontratat afatgjata të shitjes së energjisë elektrike me aktorë publikë dhe privatë. Gjysma e energjisë stë prodhuar nga centrali i shitet shtetit shqiptar, me cmimin minimal 24.89 euro për megavat-orë.
“Dëshiroj të shpreh mirënjohjen time për të gjithë ata që janë përfshirë në realizimin e këtij projekti, në veçanti Këshillit të Ministrave Shqiptarë, Ministrisë së Infrastrukturës dhe Energjisë, konsorciumit bankar nën drejtimin e Bankës Evropiane për Rindërtim dhe Zhvillim (BERZH) dhe ekipeve Voltalia”, thotë Sébastien Clerc, CEO i Voltalia.
Investimi total në projektin e Karavastasë vlerësohet në 135 milionë euro (142 milionë dollarë) dhe u bashkëfinancua nga BERZH, Korporata Financiare Ndërkombëtare (IFC), Intesa Sanpaolo Bank Albania, Privredna Banka Zagreb dhe nga burimet e veta të Voltalia. Zhvilluesi francez i termocentralit po planifikon gjithashtu një park diellor 100 MW në zonën e Spitallës pranë qytetit bregdetar të Durrësit.
p.c. / dita
