Prokuroria e Posaçme ka përfunduar hetimet ndaj ish-oficerit të strukturës së Operacionales në Policinë e Shtetit, Igli Haxhiaj, i cili në cilësinë e grupit të hetimit ndaj anëtarëve të një grupi të trafikut të drogës në vitin 2019, u shiti atyre informacione sekrete lidhur me përgjimet e vëzhgimet që po kryheshin, kundrejt përfitimeve monetare.
Prokuroria e Posaçme, SPAK njoftoi të enjten më 7 maj përfundimin e hetimeve dhe dërgimin për gjykim të çështjes penale në ngarkim të ish-oficerit të sektorit të Operacionales në Policinë e Shtetit, Igli Haxhiaj, i cili ndërkohë që ishte i ngarkuar për të vëzhguar anëtarët e një grupi kriminal me veprimtari në trafikun ndërkombëtar të drogës, u serviri atyre informacione sekrete të hetimit që po kryhej.
Haxhiaj është hetuar nën masën e sigurimit “arrest në burg” që prej nëntorit të vitit 2025, për kryerjen e veprave penale: “Shpërdorim i detyrës”, “Zbulim i akteve ose të dhënave sekrete” dhe “Korrupsion pasiv i gjyqtarëve prokurorëve dhe funksionarëve të tjerë të organeve të drejtësisë”.
Sipas SPAK, hetimet e përbashkëta me drejtësinë italiane dhe zviceriane kanë zbuluar veprimtarinë e një grupi të strukturuar kriminal, të përbërë kryesisht nga shtetas shqiptarë, që ka pasur si qëllim trafikimin ndërkombëtar të lëndëve narkotike. Anëtarët e këtij grupi operonin në territorin shqiptar dhe italian, duke importuar lëndë narkotike drejtpërdrejtë nga Amerika e Jugut dhe përmes rrugëve tregtare, duke hyrë në portet kryesore të Europës Veriore.
Në vitin 2019, kur ka filluar hetimi ndaj këtij grupi kriminal, i pandehuri Igli Haxhiaj ka qenë në cilësinë e oficerit të policisë gjyqësore në Drejtorinë e Forcës së Posaçme Operacionale, në Drejtorinë e Përgjithshme të Policisë së Shtetit. Ai ka qenë pjesë e grupit të hetimit që ka kryer përgjimin dhe vëzhgimin e fshehtë të të dyshuarve për trafik lëndësh narkotike.
Ndërkohë që ka qenë duke vëzhguar të dyshuarit, Haxhiaj akuzohet se i ka bërë me dije njërit prej tyre se ka qenë objekt hetimesh dhe që po përgjoheshin.
“I pandehuri Haxhiaj ka komunikuar përmes platformës së enkriptuar SKY ECC me shtetasin D.M., i cili konsiderohet si një nga anëtarët e grupit të strukturuar kriminal, duke i ofruar atij informacion që lidhet me veprimet hetimore që po kryheshin në atë moment, ndaj këtij shtetasi. Nga këto biseda provohet qartë fakti se i pandehuri Igli Haxhiaj e ofronte informacionin në këmbim të përfitimeve monetare, konkretisht të shumës prej 15.000 euro”, citohet në njoftim.
Si pasojë e rrjedhjes së informacioneve nga Haxhiaj, janë arratisur tre prej personave të dyshuar për trafik narkotikësh.
Implikimi i punonjësve të policisë në aktivitete të krimit të organizuar është një problem shqetësues, i cili ka dalë në sipërfaqe gjatë hetimeve të bazuara në komunikimet e aplikacionit SKY ECC. Në më shumë se një rast, ish-kreu i SPAK, Altin Dumani ka ngritur publikisht alarmin e korruptimit të zyrtarëve të policisë nga eksponentë të krimit të organizuar.
