Ka marrë nga Rama leje të shumta për resorte: Kush është Isa Aliu, skema e grupit të madh të kokainës goditur sot nga SPAK

Prokuroria e Posaçme kundër Korrupsionit dhe Krimit të Organizuar, në kuadër të procedimit penal nr. 138 të vitit 2020, ka finalizuar një operacion kompleks kundër një grupi të strukturuar kriminal, i përfshirë në trafikun ndërkombëtar të lëndëve narkotike dhe pastrimin e produkteve të veprës penale, të dyshuar për veprat penale:

“Trafikim i lëndëve narkotike”, kryer në formën e bashkëpunimit të veçantë, atë të grupit të strukturuar kriminal;

“Pastrim i produkteve të veprës penale”, kryer në formën e bashkëpunimit të veçantë, atë të grupit të strukturuar kriminal;

“Grup i strukturuar kriminal” dhe “Kryerje e veprave penale nga organizata kriminale apo grup i strukturuar kriminal”;

Gjykata ka caktuar masën e sigurimit personal shtrëngues,“Arrest në burg”, parashikuar nga neni 238 i Kodit të Procedurës Penale për 10 shtetas shqiptarë.

Një nga personat kryesor të kësaj skeme, për të cilin është nxjerrë urdhër arresti është Isa Aliu. Përmes kompanive të tij zoti Aliu ka marrë disa leje për ndërtime resortesh në bregdet nga Gjiri i Lalzit deri në Jug.

Një nga kompanitë kryesore përmes të cilit Aliu sipas SPAK ka pastruar paratë e drogës është Aliu Road House shpk.

Skema

Nga hetimet është provuar se paratë e përfituara nga trafiku ndërkombëtar i kokainës janë transferuar në Shqipëri, “cash” për të shmangur sistemin bankar në fazën e parë dhe më pas janë investuar në pasuri të paluajtshme, në krijimin dhe blerjen e aksioneve të kompanive tregtare, shoqëri të ndryshme kryesisht në fushën e ndërtimit, hotelerisë, konsulencës etj.

Në muajt Maj 2021 – Qershor 2021, rezulton se kompania “Aliu Road House” sh.p.k, ka filluar aktivitetin e saj në sektorin e ndërtimit.

Dyshohet se, për të mos tërhequr menjëherë vëmendjen nga strukturat ligjzbatuese, personi nën hetim Isa Aliu, orientoi që kompania të shfaqej fillimisht si nënkontraktore për ndërtim banesash.

Shfaqja e kompanisë në këtë mënyrë, do të “justifikonte” sërish flukset e ardhshme të parave cash dhe shtrirjen e pritshme në sektorin e ndërtimit,” thuhet në njoftimin e SPAK.

Sipas hetimeve paraprake, skema e pastrimit të parave është realizuar më pas përmes blerjes fiktive të kuotave të kapitalit në shoqëri tregtare, me çmime shumëfish më të ulëta se vlera nominale, për të marrë kontrollin e kompanive me kosto minimale.

Fondet janë qarkulluar përmes huave mes personave fizikë dhe kompanive të lidhura, me qëllim krijimin e një historiku ekonomik fiktiv dhe humbjen e gjurmës së origjinës së parave.

Pjesë e goditjes janë dhe vëllezërit Bibaj, të cilët edhe këta zotërojnë një sërë pronash dhe kompanish ndërtimi përfshirë hoteleri në Dhërmi përmes kompanisë Altea Invest.

Shpëtim Bibaj dhe vëlezërit e tij zotërojnë edhe hotelin e afiluar nga Melia i Artan Dulakut i quajtur Hotel Elisa Tirana.

Vijon