Ministri i jashtëm i Iranit, Abbas Araghchi Ka dënuar sulmet e SHBA-së ndaj objekteve bërthamore të vendit, duke thënë se Shtëpia e Bardhë do të jetë plotësisht përgjegjëse për pasojat e veprimeve të saj.
“Republika Islamike e Iranit dënon me fjalët më të ashpra agresionin brutal ushtarak të Shteteve të Bashkuara kundër objekteve bërthamore paqësore të Iranit. Është një shkelje e egër, e rëndë dhe e pashembullt e parimeve themelore të kartës së Kombeve të Bashkuara dhe të drejtës ndërkombëtare”, tha Abbas Araghchi në një konferencë shtypi në Stamboll të dielën.
Ai shtoi se “administrata luftënxitëse dhe e paligjshme në Uashington është e vetmja dhe plotësisht përgjegjëse për pasojat e rrezikshme dhe implikimet e gjera të aktit të saj të agresionit”.
“Heshtja përballë një agresioni kaq të hapur do ta zhytë botën në një nivel të paparë rreziku dhe kaosi. Njerëzimi ka shkuar shumë larg si specie për të lejuar një ngacmues të paligjshëm të na kthejë në ligjin e xhunglës”, theksoi Araghchi.
Araghchi i bëri thirrje Këshillit të Sigurimit të Kombeve të Bashkuara të thërrasë një seancë urgjente “për të dënuar pa mëdyshje aktin kriminal të agresionit nga Shtetet e Bashkuara kundër Iranit dhe për ta mbajtur administratën në Uashington përgjegjëse për shkeljet e parimeve themelore të kartës së Kombeve të Bashkuara dhe të normave të së drejtës ndërkombëtare”.
Araghchi vazhdoi duke thënë se Irani vazhdon të mbrohet me të gjitha mjetet e nevojshme jo vetëm kundër agresionit ushtarak amerikan, por edhe kundër veprimeve të pamatura dhe të paligjshme të Izraelit.
Ministri i Jashtëm i Iranit tha më tej se nuk e di se sa “hapësirë ka mbetur për diplomaci”.
“Ata kaluan një vijë të kuqe shumë të madhe duke sulmuar objektet bërthamore… Ne duhet të përgjigjemi bazuar në të drejtën tonë legjitime për vetëmbrojtje”, tha Araghchi.
j.l./ dita
