Për të tretën ditë radhazi, përfaqësuesit e listës serbe kanë paralajmëruar për një tjetër protestë nga serbët lokalë, kundër kryetarëve shqiptarë.
Serbët kërkojnë tërheqjen e policisë se Kosovës dhe kryekomunarëve shqiptarë të cilët prej ditësh kanë tentuar të hyjnë në selitë e ndërtesave shtetërore për të nisur nga puna.
Mëngjesin e kësaj të mërkure, forcat e KFOR kanë përforcuar masat duke vendosur tela me gjemba.
Albin Kurtit i kërkon t’i sigurojë kryetarëve të rinj vende të tjera jashtë komunave për të kryer detyrën dhe të tërheqë policët nga godinave ndërsa presidentit serb Aleksandër Vuçiç i thotë se duhet t’i bëjë thirrje serbëve që të përmbahen nga dhuna.
Për këtë situatë ka reaguar edhe Sekretari Amerikan i Shtetit, Antony Blinken, i cili kërkon që palët të ulin menjëherë tensionet.
Përmes një deklarate në faqen zyrtare, Blinken shprehet se SHBA dënon dhunën ndaj KFOR-it të udhëhequr nga NATO, forcave të rendit dhe gazetarëve. Ai u ka bërë thirrje palëve në konflikt, Kosovë-Serbi që të marrin masat dhe të ulin menjëherë tensionet, ndërsa shtoi se situata e protestave është përshkallëzuar për shkak se qeveria e Kosovës kërkon të hyjë në ndërtesat komunale.
Blinken ka dy kërkesa ndaj qeverisë së Kosovës, të sigurojë që kryetarët e zgjedhur të kryejnë detyrat e tyre nga vendodhje alternative jashtë ndërtesave komunale dhe të tërheqin forcat policore. Ai gjithashtu i ka bërë thirrje Serbisë dhe Presidentit serb Aleksandër Vuçiç të ulin statusin e sigurisë së Forcave të Armatosura Serbe dhe t’u bëjnë thirrje serbëve të Kosovës që të përmbahen nga dhuna e mëtejshme.
Deklarata e plotë:
U bëjmë thirrje të gjitha palëve që të ndërmarrin veprime të menjëhershme për të ulur tensionet. Shtetet e Bashkuara dënojnë dhunën e papranueshme dje kundër trupave të KFOR-it të udhëhequr nga NATO, forcave të rendit dhe gazetarëve. Vendimi i Qeverisë së Kosovës për të detyruar hyrjen në ndërtesat komunale përshkallëzoi tensionet në mënyrë të mprehtë dhe të panevojshme. Kryeministri Kurti dhe qeveria e tij duhet të sigurojnë që kryetarët e zgjedhur të kryejnë detyrat e tyre kalimtare nga lokacione alternative jashtë ndërtesave komunale dhe të tërheqin forcat policore nga afërsia. Presidenti Vuçiq dhe Qeveria e Serbisë duhet të ulin statusin e sigurisë së Forcave të Armatosura Serbe dhe t’u bëjnë thirrje serbëve të Kosovës që të ndalojnë së sfiduari KFOR’in dhe të përmbahen nga dhuna e mëtejshme. Si Kosova ashtu edhe Serbia duhet menjëherë të angazhohen në Dialogun e lehtësuar nga BE-ja për normalizimin e marrëdhënieve.
j.l./ dita
