SHBA po shqyrton vendosjen e kufizimeve të reja të Covid për shtetasit kinezë, pasi Pekini njoftoi se do të rihapë kufijtë e tij muajin e ardhshëm.
Zyrtarët amerikanë thonë se kjo është për shkak të mungesës së transparencës rreth virusit në Kinë, pasi rastet janë në rritje.
Japonia, Malajzia dhe Tajvani, të shqetësuara për përhapjen e rasteve të Covid, kanë marrë masa më të rrepta për udhëtarët kinezë, përfshirë testet negative.
Pekini tha se rregullat e Covid duhet të merren mbi një bazë “shkencore”.
India gjithashtu po rrit masat, por kjo u njoftua përpara se Pekini të deklaronte se do të lehtësonte politikën e tij të rreptë kufitare.
Aplikimet për pasaporta për qytetarët kinezë që dëshirojnë të udhëtojnë ndërkombëtarisht do të rifillojnë nga 8 janari, kanë thënë autoritetet e imigracionit të vendit.
Ndërkohë shumë vende janë frikësuar për përhapjen e COVID.
“Ka shqetësime në rritje në komunitetin ndërkombëtar për rritjet e vazhdueshme të rasteve të Covid-19 në Kinë dhe mungesën e të dhënave transparente”, thanë zyrtarët amerikanë në një deklaratë të cituar nga agjencitë e lajmeve.
Wang Wenbin, zëdhënësi i ministrit të Jashtëm të Kinës tha se vendimet e vendeve për marrjen e masave duhet të jenë “të bazuara në shkencë dhe proporcionale” dhe “nuk duhet të ndikojnë në shkëmbimin normal njerëz-me-njerëz”.
Ai bëri thirrje për “përpjekje të përbashkëta për të garantuar udhëtime të sigurta ndërkufitare, për të ruajtur stabilitetin e zinxhirëve globalë të furnizimit industrial dhe për të promovuar rimëkëmbjen dhe rritjen ekonomike”.
Numri i vërtetë i rasteve ditore dhe vdekjeve në Kinë nuk dihet sepse zyrtarët kanë ndaluar së publikuari këto të dhëna.
Javën e kaluar, Pekini raportoi rreth 4.000 infeksione të reja Covid çdo ditë dhe pak vdekje.
Brenda gjysmë ore nga njoftimi i së hënës se kufijtë e Kinës do të rihapen, të dhënat treguan se kërkimet për destinacionet e njohura ishin rritur dhjetëfish në krahasim me vitin e kaluar.
Makau, Hong Kongu, Japonia, Tajlanda dhe Koreja e Jugut ishin destinacionet më të njohura.
j.l./ dita
Mashtrimi vazhdon
Tani kinezet me Covid 19 do te vine pa viza ne Shqiperi…