Qeveria kineze mohoi sot se do të furnizojë Rusisë me armë për të mbështetur sulmin rus në Ukrainë, siç pretendoi Sekretari i Shtetit i SHBA Anthony Blinken.
“Ne nuk pranojmë që SHBA të kritikojë marrëdhëniet midis Kinës dhe Rusisë, e lëre më të ushtrojë presion dhe detyrim”, tha Wang Wenbin, një zëdhënës i Ministrisë së Jashtme kineze, duke akuzuar Uashingtonin për përhapjen e informacionit të rremë.
Sekretari amerikan i Shtetit, Anthony Blinken paralajmëroi dje, se Kina po shqyrton furnizimin me armë Rusisë, pasi u takua me homologun e tij kinez Wang Yi në Mynih, në margjinat e Konferencës së Sigurisë.
“Ne folëm për luftën që po zhvillohet nga Rusia dhe shqetësimet që kemi se Kina po shqyrton ofrimin e mbështetjes vdekjeprurëse për Rusinë”, tha Blinken për CBS.
I pyetur se çfarë do të thotë konkretisht, kreu i diplomacisë amerikane u përgjigj: Kryesisht armë.
Nënpresidentja e SHBA Kamala Harris, e cila ishte e pranishme të shtunën në Mynih, kishte vënë në pikëpyetje gjithashtu neutralitetin e Kinës. Shtetet e Bashkuara janë të shqetësuara se Pekini që nga fillimi i luftës ka thelluar marrëdhëniet e tij me Moskën.
“Çdo lëvizje nga Kina për të ofruar mbështetje vdekjeprurëse për Rusinë do të shpërblente vetëm agresionin, do të vazhdonte vrasjen dhe do të minonte më tej një rend të bazuar në rregulla”, paralajmëroi zëvendëspresidentja.
“Ne i bëjmë thirrje Shteteve të Bashkuara të mendojnë seriozisht për veprimet e veta dhe të bëjnë më shumë për të qetësuar situatën, për të promovuar paqen dhe dialogun, për të ndaluar fajësimin e të tjerëve dhe përhapjen e informacionit të rremë. Pozicioni i Kinës për çështjen e Ukrainës mund të përmblidhet në një fjali, që është të inkurajojë paqen dhe të promovojë dialogun”, tha zëdhënësi kinez.
j.l./ dita
