Presidenti i Kinës, Xi Jinping, i ka lëshuar një paralajmërim personal homologut nga Rusia, Vladimir Putin.
Këshilla e tij serioze për mikun në Kremlin është që të mos kryejë një sulm bërthamor në Ukrainë. Kështu raporton media prestigjoze, Financial Times, duke theksuar faktin që “funksionarët kinezë kanë meritë të veçantë në bindjen e liderit rus që të tërhiqet nga kërcënimet e fshehta bërthamore”.
Sipas disa zyrtarëve kinezë dhe perëndimorë, Xi Jinping është i shqetësuar për luftën e Rusisë kundër Ukrainës, edhe pse mbështet Moskën nga ana politike. Lidhur me këtë raportim ka reaguar dhe Kremlini.
Zëdhënësi Dmitry Peskov e konsideroi lajmin për paralajmërimin e Xi ndaj Putinit, një shpikje.
Përkundër kësaj, fatkeqësia nukleare mund të vijë edhe nga ndonjë pakujdesi. Kievi dhe Moska po shkëmbejnë akuza serioze lidhur me një sulm potencial në impiantin energjitik bërthamor në Zaporizhzhia.
Presidenti ukrainas, Volodymyr Zelensky, tha se prioritet është mbrojtja e centraleve por edhe e qytetarëve. Ministria e shëndetësisë në Ukrainë ka shpërndarë udhëzime për njerëzit se si të sillen për t’u mbrojtur nga rrezatimet nëse do të ndodhte një incident bërthamor.
Kremlini njoftoi se rreziku për një aksion sabotazhi nga ushtria e Kievit në impiantin e Zaporizhzhias, që kontrollohet nga rusë, mbetet shumë i lartë.
Ndërkohë, numri dy i këshillit të sigurisë së Rusisë, Dmitry Medvedev, ka folur për fundin e luftës, duke konfirmuar se do të vijë kur Shtetet e Bashkuara dhe perëndimi të ndalojë së furnizuari me armë Ukrainën.
