Armado Sadiku, tashmë pjesë e Cartagenas në LaLiga2, rikthehet në përfaqësuesen kuqezi pas tre vjetësh. Edhe pse jo me statusin e dikurshëm, si “bomberi” kryesor i Kombëtares, beson se mund të japë ende kontribut për fanellën kuqezi.
Tri vite pa qenë në kombëtare…?
Prisja që trajneri të më thërriste. Me ka marrë në telefon dhe kemi biseduar disa herë, jam i kënaqur që u ktheva, kisha koha që e prisja këtë moment.
Si e keni gjetur grupin, pas ka shumë fytyra të reja…
Ka çuna të rinj, disa i kam takuar, por edhe të tjerët i njoh. Është krijuar një grup i mirë, ka cilësi. Jemi të gjithë për një qëllim. Jam shumë i kënaqur që jam pjesë e Kombëtares dhe jap kontributin tim.
E mbyllet me Kartagjenën?
Më kanë propozuar të njëjtën kontratë që kisha, por u kam kërkuar pak kohë, meqë jam pjesë e Kombëtares. Kur të mbyllim ndeshjet e Kombëtares, sepse kam edhe oferta të tjera, pastaj do të vendos.
Duhet t’i fitojmë ndeshjet e radhës. E shihni që mesfusha e ka potencialin për t’ju furnizuar me topa?
Vetëm të shohësh ku luajnë mesfushorët, e kupton që ka shumë kualitet. Ne duhet të jem të vëmendshëm në çdo aksion, duhet të shfrytëzojmë rastet dhe të shënojmë gola. Kundërshtarët tanë do të qëndrojnë në mbrojtje, dhe ne sulmuesit kemi besim se do të shërbehemi dhe duhet të shënojmë.
Mund ta përsëritim suksesin e vitit 2016?
Jam i bindur dhe kam besim. Grupi na e lejon, edhe pse nuk mendoj se ka ekipe të dobëta. Kam besim se do t’ia arrijmë, edhe më mbështetjen e tifozëve në shtëpinë tonë. Shpresoj të përsëritim suksesin e vitit 2016.
Sylvinho ju ka cilësuar simbol të Kombëtares…
Jam shumë i lumtur, më ka thirrur në telefon, kemi biseduar dhe më ka thënë se do të jem i rëndësishëm. Unë do të jem në dispozicion të tij dhe këtë besim t’ia shpërblej në fushë.
Çfarë prisni nga tifozët në ndeshjen me Moldavinë?
Është e vërtetë që pa tifozët nuk do të shkonim në Evropian. Pa mbështetjen e tyre nuk do t’ia kishim dalë. U bëj thirrje që të na mbështesin, sepse kemi shumë nevojë për ta, do t’ua shpërblejmë dhe do të kthejmë atmosferën e 2016.
S e sheh konkurrencën dhe mendoni se do të luani?
Konkurrenca të përmirëson, pastaj zgjedhjet i përkasin trajnerit. Duhet të jemi të gatshëm të japim maksimumin sa herë të na jepet mundësia.
