Xhudistja e Kosovës, Distria Krasniqi ka fituar medaljen e argjendtë në Grand Slamin që po mbahet në Tbilisi të Gjeorgjisë. Shqiptarja e Kosovës e ka nisur mirë ditën duke fituar ndeshjet nga raundi i dytë deri në finale në kategorinë deri në 52 kilogramë.
Pejania fitoi përballjen e parë ndaj Charne Griesel për të kaluar në çerekfinale, ku u takua me belgen Amber Ryheul, të cilën e mposhti pa shumë vështirësi për të kaluar në gjysmëfinale.
Në gjysmëfinale, Distria arriti të mposht me ‘ippon’ gjermanen Mascha Ballhaus për të siguruar finalen e madhe. Në përballjen e fundit të kategorisë deri në 52 kilogramë, kampionia e Kosovës u ndesh me Diyora Keldiyorova nga Uzbekistani, të cilën nuk arriti ta mposhtë.
Kështu, Distria pas kësaj humbje u desh të mjaftohej me medaljen e argjendtë në Grand Slamin e Tbilisit.
o.j/dita
