Kremlini mohoi të hënën raportet se presidenti Vladimir Putin dhe presidenti i zgjedhur i SHBA-së, Donald Trump, kanë folur në telefon javën e kaluar për luftën në Ukrainë.
Washington Post raportoi më herët se Trump, në një telefonatë të bërë të enjten, e paralajmëroi Putinin kundër përshkallëzimit të konfliktit dhe i kujtoi liderit të Kremlinit “prezencën e konsiderueshme ushtarake të Uashingtonit në Evropë”.
Sipas disa burimeve të njohura me thirrjen telefonike, Trump shprehu një interes për bisedat pasuese për të diskutuar “zgjidhjen e luftës së Ukrainës së shpejti”.
Por Kremlini tha të hënën se “asnjë bisedë nuk ndodhi”. “Kjo është krejtësisht e pavërtetë. Ky është një trillim i pastër, ky është thjesht informacion i rremë”, u tha gazetarëve të hënën zëdhënësi i Kremlinit, Dmitry Peskov, kur u pyet për të komentuar raportin.
Ndërkohë, Ministria e Jashtme e Ukrainës tha se nuk ishte njoftuar paraprakisht për telefonatën e raportuar mes Trump dhe Putin.
Trump, i cili siguroi një mandat të dytë historik në Shtëpinë e Bardhë javën e kaluar, është zotuar t’i japë fund luftës në Ukrainë përpara se të bëjë betimin në janar.
Kritikat e tij për mbështetjen e presidentit në largim Joe Biden për Ukrainën ka ngritur shqetësime në Kiev se Uashingtoni mund të pezullojë dërgesat e armëve, duke dobësuar potencialisht mbrojtjen e Ukrainës kundër forcave pushtuese ruse.
Wall Street Journal raportoi javën e kaluar se këshilltarët e Trump kanë paraqitur disa propozime që në mënyrë efektive do të ngrinin luftën, duke forcuar fitimet territoriale të Moskës në Ukrainë.
j.l./ dita
