Kreu i Prokurorisë së Posaçme, Klodian Braho, ka konfirmuar se SPAK po zhvillon hetime ndaj deputetes së Partisë Socialiste, Sara Mila. Gjatë një takimi me gazetarët, Braho nuk dha detaje mbi çështjen, duke u kufizuar në konfirmimin se hetimet janë ende në vijim.
Deklarata e kreut të SPAK vjen pesë ditë pas paraqitjes së deputetes në ambientet e Prokurorisë së Posaçme. Më 11 nëntor, Mila u thirr për t’u marrë në pyetje, ku qëndroi për një periudhë prej rreth 40 minutash deri në një orë.
Pas daljes nga SPAK, deputetja socialiste deklaroi se ishte paraqitur në cilësinë e personit që kishte dijeni për rrethanat e çështjes dhe se kishte dhënë dëshminë e saj. Ajo nuk pranoi të bënte publike arsyet konkrete të thirrjes, duke iu referuar sekretit hetimor.
Ndërkohë, sipas raportimeve mediatike, hetimet dyshohet se lidhen me një çështje të korrupsionit zgjedhor në qarkun e Elbasanit gjatë zgjedhjeve parlamentare të vitit 2025.
Në fokus të verifikimeve të SPAK dyshohet të jetë përdorimi i skemës së ndihmës ekonomike si një mekanizëm i mundshëm për të ndikuar te votuesit gjatë procesit zgjedhor.
Deri më tani, Prokuroria e Posaçme nuk ka dhënë informacion zyrtar mbi dyshimet konkrete, objektin e plotë të hetimit apo veprimet hetimore të kryera ndaj deputetes socialiste.
Konfirmimi i Klodian Brahos e bën tashmë zyrtar faktin se Sara Mila është pjesë e një procesi hetimor të SPAK, ndërsa mbetet për t’u parë se çfarë do të zbulojnë verifikimet e mëtejshme të Prokurorisë së Posaçme.
j.l./ dita
