Kryetarja e Gjykatës Kushtetuese të Shqipërisë, Holta Zaçaj i dha mesazhe të qarta politikës, se pushteti gjyqësor mund të funksionojë vetëm kur është i pavarur. Me rastin e 25-vjetorit të Kushtetutës, Zaçaj tha se i kupton kritikat ndaj gjyqtarëve, si një e drejtë e lirisë së shprehjes, mirëpo thekson se nuk duhet të kthehen në sulm apo si mjet presioni ndaj tyre.
“Kritikat ndaj Gjykatës dhe gjyqtarëve të saj janë një indikator i lirisë së shprehjes për të cilën ne të gjithë kemi luftuar, por deri në atë masë që nuk kthehen në sulm ose mjet presioni ndaj tyre. Mos të harrojmë, pushteti gjyqësor, mund të luajë rolin e tij kushtetues vetëm nëse është i pavarur. Politizimi i gjyqësorit dhe gjyqësorizimi i politikës kanë qenë dhe janë fenomene, të cilat përbëjnë sfida të vazhdueshme të demokracive në zhvillim, por edhe të atyre të konsoliduara”, tha Zaçaj
Ajo e konsideroi Kushtetutën si një vepër madhore të shtetformimit.
“Kushtetuta, vepër madhore e shtetformimit tonë. Kushtetuta prej 25 vitesh është streha jonë e përbashkët që garanton shtetin e së drejtës dhe të drejtat tonë njerëzore. Kushtetuta përfaqëson referencën themelore dhe njësinë matëse për të verifikuar mënyrën e ushtrimit të pushteteve dhe mbrojtjen e respektimin e të drejtave themelore. Ajo është kryefjala e diskursit tonë të përditshëm”, tha ajo.
Nga ana tjetër, presidenti Bajram Begaj, tha se sistemi i drejtësisë po përballet me një sfidë të madhe, por që duhet superuar për t’iu afruar sa më shumë qytetarëve me eficencë, barazi para ligjit, transparencë.
p.k\dita
