Pas disa sezoneve të shkëlqyera, ekipi verior duket se ka rënë në ditët më të errëta. Kukësi harron fjalën fitore, pasi regjistroi ndeshjen e gjashtë pa sukses. Verilindorët barazuan pa gola në shtëpi ndaj Teutës, në duelin për mbijetesën. Skuadra e Hallacit ishte më kërkuese në pjesën e parë duke krijuar më tepër volum loje, por pa arritur që të konkretizojë rastet.
Në fraksionin e parë mund të veçohet rasti i kapitenit Gjelbrim Taipi, i cili në të 33-ën u ndal nga Qirko. Gjashtë minuta më vonë ishte Murati që rrezikoi, ndërkohë që pak pa u mbyllur pjesa e parë Delimexhiç sërish provoi, por përsëri portieri i Teutës e ndali me sukses. Pjesa e dytë nisi më mirë për durrsakët, që iu afrua golit me anë të Kallakut, por goditja e befasishme nga distanca u devijua nga Halimi. Pak pasi ishte mbushur një orë lojë, Teuta pretendoi për një 11-metërsh, por kryesori sinjalizoi faull në mesfushë për Kukësin në nisje të aksionit.
