Protestat në veri nuk kane qenë paqësore, por janë turma ekstremistësh të dirigjuara nga Beogradi zyrtar. Kështu është shprehur kryeministri Albin Kurti në prani të ambasadorëve të QUINT-it, të cilët i ka pritur pasditen e së hënës.
Në një deklaratë të shpërndarë nga Qeveria e Kosovës thuhet se veprimet e dhunshme duhet të dënohen nga të gjithë.
“Grafitet nacionaliste shoviniste serbe dhe aso pro-Kremlinit me ekstremistë të maskuar, që targetojnë, vandalizojnë dhe sulmojnë çdo gjë jo-serbe, është treguesi kryesor i motiveve prapa veprimeve të dhunshme, e të cilat duhet të dënohen ashpër nga të gjithë”, thuhet në komunikatë.
Duke i informuar për gjendjen në veri dhe zhvillimet e sotme atje, kryeministri -vijon komunikata- theksoi rëndësinë dhe nevojën për de-eskalimin e situatës, si dhe shprehu gatishmërinë për të punuar me shtetet e QUINT-in drejt këtij qëllimi. Ata thuhet se janë dakorduar që të mbajnë komunikim të dendur orëve dhe ditëve në vijim.
Bashkë me Kurtin, në takim me ambasadorët e vendeve të QUINT-it dhe Shefin e Zyrës së Bashkimit Evropian në Kosovë, ka qenë edhe zëvendëskryeministri i parë për Integrim Evropian, Zhvillim dhe Dialog, Besnik Bislimi.
m.b/dita
