Analisti Mero Baze thotë se nuk ka patur seancë për Veliajn dje në Apel.
“Dje disa portale që përdoren për propagandë linçuese nga segmente të SPAK publikuan me bujë lajmin se Erion Veliaj do paraqitet në Gjykatën e Apelit për të kundërshtuar masën e arrestit dhe se madje ka paguar garanci financiare për të siguruar lirinë me kusht. Më pas doli lajmi se Gjykata nuk ia pranoi ato garanci dhe e la në burg” – shkruan Baze dhe shton:
“Natyrisht, gjithçka ishte një gënjeshtër, e dalë më së paku nga zyra e prokurorit Olsi Dado, i cili duket se e ka kthyer këtë proces në një betejë personale. Erion Veliaj as kishte ankimuar dje ndonjë masë arresti, as kishte paguar ndonjë garanci financiare, pasi gjykimi për masën e arrestit të tij në Apel ka përfunduar një muaj më parë”.
Po çfarë ka patur dje në Apel?
“Dje ishte një procedurë formale e prokurorit që mbronte vendimin e tij për ta mbajtur Veliajn në burg, çka tashmë është fakt i kryer. Veliaj as nuk ishte fare në gjykatë. Por ama lajmet ishin për ta poshtëruar atë” – shkruan gazetari i njohur i cili edhe më herët ka vënë në dukje probleme me prokurorin e Veliajt.
“Ky proces linçimi dhe ligësia e cinizmi me të cilin veprohet ndaj jetës personale të një qytetari dhe të drejtave njerëzore të tij, ka tejkaluar çdo limit njerëzor, çdo konventë evropiane dhe amerikane.
Dhe mbi të gjitha ka krijuar bindjen te një pjesë e madhe e opinionit publik se metodat hakmarrëse dhe represioni po dominojnë veprimtarinë e SPAK për shkak të mbështetjes politike paraprake që ka marrë nga shumica socialiste. Dhe ky është tashmë një problem edhe për shumicën socialiste” – shkruan Baze.
n.s. / dita
