Lidhja Demokratike e Kosovës do të mbledh sot Kuvendin e Jashtëzakonshëm, ku 355 delegatë do të votojnë për të vendosur nëse Lumir Abdixhiku do të vazhdojë të drejtojë partinë apo do të shkarkohet nga posti i kryetarit. Kuvendi është thirrur pasi u përmbushën procedurat statutare dhe kërkesa u mbështet nga të paktën një e treta e delegatëve.
Ky ishte një kriter i nevojshëm për organizimin e një mbledhjeje të jashtëzakonshme. Kuvendin e partisë e përbëjnë 354 delegatë të zgjedhur në kuvendet e degëve, plus kryetari aktual i LDK-së, që me automatizëm është delegat i Kuvendit të Përgjithshëm të LDK-së.
Pasi, Sekretariati i Përgjithshëm verifikoi se ishin plotësuar të gjitha kushtet statutare për zhvillimin e procesit, kryetari i LDK-së, Lumir Abdixhiku, caktoi mbajtjen e Kuvendit. Kuvendi do të zhvillohet sot në datë 30 korrik, në orën 18:00, në përputhje me kompetencat e parashikuara në Statutin e partisë.
Nënshkrimet për thirrjen e Kuvendit u dorëzuan në mesin e muajit korrik, ndërsa pas nisjes së procesit, Abdixhiku pezulloi negociatat për formimin e institucioneve të reja të Kosovës deri në përfundimin e votëbesimit ndaj tij.
Në kuvendin e 30 korrikut do të shtjellohet çështja e ngritur nga anëtarët e partisë për shkarkimin e kryetarit. Abdixhiku do të vazhdojë ta udhëheqë partinë nëse e rifiton votëbesimin, por në rast se e humb atë, atëherë LDK-ja duhet ta zgjedhë një kryetar të ri.
Lidhja Demokratike e Kosovës është një nga partitë më të vjetra në Kosovë, e themeluar në vitin 1989 nga Ibrahim Rugova. Ajo ka luajtur rol kyç në periudhën e rezistencës paqësore dhe në ndërtimin e institucioneve demokratike të vendit.
j.l./ dita
