Roberto Mancini është i bindur se Luciano Spalletti është pasuesi perfekt i tij në kombëtaren e Italisë. 58-vjeçari, i cili udhëhoqi të kaltrit drejt fitimit të Euro 2020, dha dorëheqjen duke i befasuar të gjithë.
“Nuk kam vrarë askënd, prandaj më vjen keq kur lexoj kaq kritika ndaj vendimit tim. Kishte ardhur momenti për t’u larguar”, theksoi Mancini, i cili shpjegon se ndërhyrjet e Gravinës (presidenti i FIGC) ndikuan që të largohej.
Sa i përket Spallettit, i cili po pret lejen e presidencës së Napolit për t’u emëruar në stolin e katër herë kampionëve të botës, Mancini deklaroi:
“Nëse zgjidhet i uroj Lucianos të ardhme sa më të mirë në pankinën e Italisë. Është një rol që të ofron emocione unike.
Jam i sigurt se Spalletti do të bëjë shumë mirë tek Italia”, u shpreh Mancini, e ardhmja e të cilit do të jetë kombëtarja e Arabisë Saudite.
