Maturantët që duan Mjekësinë, formulës së pranimit i shtohet edhe testimi online

Ndryshon formula e konkurrimit për vijimin e studimeve të larta në degën e Mjekësisë së përgjithshme. Duke nisur nga viti i ardhshëm, të gjithë maturantët dhe kandidatët që do të duan të garojnë për të fituar një të drejtë studimi në programin e Mjekësisë, krahas mesatares së lartë të studimeve të shkollës së mesme dhe lëndëve preferenciale, do të duhet t’i nënshtrohen edhe konkursit (testimit të informatizuar) që do të zhvillohet në ambientet e Qendrës së Shërbimeve të Arsimit. Në një diskutim të zhvilluar me maturantët në lidhje me ndryshimet që do të pësojë Matura Shtetërore 2023, ministrja e Arsimit dhe Sportit, Evis Kushi, ka komunikuar edhe risinë për garën e pranimeve të reja që do të zhvillohen për degën e Mjekësisë, teksa ka komunikuar edhe rikthimin e rivlerësimit të testeve të maturës.

Formula e re e pranimeve për degën e Mjekësisë

Formula e re e pranimeve do të nisë më maturantët e këtij viti dhe fillimisht do të pilotohet vetëm për degën e Mjekësisë së Përgjithshme, me qëllim për t’u shtrirë më pas edhe në degët e tjera të strukturave të arsimit të lartë, fillimisht ato shëndetësore dhe më pas degët e tjera. Kjo pasi, sipas specialistëve të dikasterit të Arsimit, konkursi do të ketë shtrirje në kohë për shkak të numrit të lartë të kandidatëve që synojnë degën e Mjekësisë. Në këto kushte, gjatë pranimeve të reja që do të realizohen për vitin 2023, testimi i informatizuar nuk do të zhvillohet për kandidatët që do të duan të garojnë në degët e tjera të profileve mjekësore, siç janë farmacia, stomatologjia apo degët e tjera.

“Ata maturantë që duan të zgjedhin programin Mjekësi e Përgjithshme, pra duan të vazhdojnë studimet për Mjekësi e Përgjithshme, përveç detyrimeve që ka aktualisht sistemi për provimet e maturës mesataret ajo formula që tashmë është aktive, kanë detyrim të japin edhe një provim tjetër, i cili është një provim që zhvillohet në mjediset e Qendrës së Shërbimeve Arsimore, është provim i automatizuar siç bëhet provimi i portalit të punësimit, apo siç bëhen provimet e licencave, në mënyrë që të shmanget edhe gabimi, të shmanget edhe fiktiviteti, të shkurtohet koha dhe në fund të fundit ai sistemi meritë-preferencë që synon i gjithë sistemi i maturës shtetërore të realizohet 100 për qind”, ka deklaruar gjatë ditës së djeshme ministrja e Arsimit dhe Sportit, Evis Kushi në takimin e zhvilluar me maturantët rreth ndryshimit të kritereve të pranimit në universitete.

Drejtoresha e Qendrës së Shërbimeve Arsimore, Aurora Balliu sqaroi për maturantët se pyetjet e konkursit për degën e Mjekësisë do të hartohen nga mësues të shkollës së mesme. Ndërkohë që fondi i pyetjeve që do të përfshihen në testim do të publikohet përpara, që maturantët të njihen me tipologjinë e tyre dhe të orientohen në përgatitjet që duhet të zhvillojnë për këtë testim. Autoritetet e arsimit sqarojnë se do të testohen në të njëjtën kohë 100 aplikantë të cilët kanë të njëjtin test, sepse testin e gjeneron në mënyrë automatike sistemi. Sipas tyre testi do të jetë i ndarë në tri nivele ashtu sikurse edhe testi i maturës është, apo sikundër janë edhe testet që zhvillohen në shkollë. Sipas skemës së përcaktuar është menduar teza e provimit online do të ketë në përmbajtje rreth 50 pyetje të cilat do të vlerësohen me një sistem prej me 100 pikësh, duke përfshirë pyetjet për të tria nivelet e vështirësive

Në përfundim të zhvillimit të testimit çdo maturant do të mund të mësojë edhe pikët e marra me të gjitha përgjigjet e dhëna. “Përgjigjen ju e merrni përmes një deklarate në kohë reale, sapo e përfundoni provimin dhe që sapo përfundoni provimin ju kuptoni se në cilin pozicion të rankimit jeni”, ka bërë me dije drejtoresha e Qendrës së Shërbimeve të Arsimit, Aurora Balliu.

Ndryshimet në korrigjimin e testeve të Maturës

Për vite me radhë pas zhvillimit të provimeve të detyruara dhe lëndës me zgjedhje, kanë qenë më qindra maturantët që kanë kërkuar për të parë kopjet e korrigjuara të testeve, pasi kanë qenë të pakënaqur me vlerësimin e marrë. Ndonëse në rregulloret e provimeve të zbatuara deri në këtë vit, lejohej që të merrej kopja e një testi të korrigjuar, maturantët nuk mund të kërkonin vlerësimin e tij në rastet e konstatimit të korrigjimeve të pasakta.

Me ndryshimet e bëra në Rregulloren e Maturës Shtetërore që do të zbatohet për provimet e 2023, maturantëve do t’u jepet mundësia për të marrë kopjen e testit të korrigjuar të çdo lënde, teksa do të mund të kërkojnë edhe rivlerësimin e tyre, në rast se do të konstatojnë vlerësime jo korrekte nga mësuesit. “Ajo pika tek rregullorja ku thuhet që nuk lejohet rivlerësimi i testit do të shfuqizohet. Aty ku ka, qoftë gabim teknik, apo njerëzor, do të bëhet rivlerësimi i testit”, ka sqaruar ministrja Kushi.

KRITERET E PRANIMIT PËR UNIVERSITETIN E MJEKËSISË

Për të konkurruar për studimet e larta në degët Farmaci, Mjekësi i përgjithshme dhe Stomatologji do të mund të hyjnë vetëm maturantët dhe kandidatët e tjerë që kanë notë mesatare të shkollës së mesme nga 8.5 dhe më lart. Ndërsa për të garuar në degët për programet e teknikës dentare dhe higjienist dentar duhet një mesatare mbi notën 7, për degët logopedi, teknik laboratori, teknik imazherie, mami, fizioterapi, infermieri e përgjithshme duhet mesatare e shkollës së mesme mbi notën 7.5, si dhe për degën e shëndetit publik duhet mesatare e gjimnazit mbi notën 8. Krahas mesatares minimale që duhet për të hyrë në konkurrim për degët e këtij universiteti, janë miratuar edhe tre kritere mbi të cilat do të bazohet përzgjedhja e fituesve të rinj, teksa edhe një kriter i katërt do të zbatohet vetëm për konkurrimet në degën e Mjekësisë së përgjithshme.

Kriteri 1

Kriteri i parë ka të bëjë me mesataren e shkollës së mesme që vlerësohet me 30 për qind të ndikimit në shpalljen e fituesve të rinj. Kjo notë përllogaritet si mesatare aritmetike e thjeshtë e notave përfundimtare vjetore të lëndëve për të gjitha vitet e shkollimit në arsimin e mesëm dhe mesatarja aritmetike e thjeshtë e notave të provimeve të maturës.

Kriteri 2

Kriteri i dytë ka të bëjë me mesataren e provimeve të Maturës Shtetërore 2023, ose maturave të mëparshme. Ky kriter vlerësohet me 40 për qind të ndikimit në shpalljen e fituesve të rinj të këtij viti. Sa i takon këtij treguesi sqarohet se nëse një kandidat jep provim lëndë me zgjedhje: Kimi, Fizikë, Biologji, nota e provimit shumëzohet me 1.4. Nëse një kandidat jep provim lëndë me zgjedhje, të ndryshme nga këto tre lëndë të përcaktuara, nota e provimit shumëzohet me koeficientin 1.

Kriteri 3

Kriteri i tretë ka të bëjë me mesataren e tre lëndëve formuese që janë: Kimi, Biologji dhe Fizikë. Sipas vendimit të marrë më herët nga Senati Akademik i këtij universiteti, nota mesatare aritmetike e lëndëve formuese (Fizikë, Kimi dhe Biologji), të zhvilluara gjatë tri viteve të shkollës së mesme përbën 30 për qind të ndikimit në shpalljen e fituesve të rinj. Kur lëndët Fizikë, Kimi dhe Biologji janë të vitit të tretë, shumëzohen me koeficient 1.25

Kriteri 4 (vetëm për degën e Mjekësisë)

Maturantët dhe kandidatët që do të duan të vijojnë studimet në degën e Mjekësisë së përgjithshme do të duhet të japin edhe testimin e informatizuar që do të zhvillohet në Qendrën e Shërbimeve të Arsimit, duke nisur nga viti 2023.