Dmitry Medvedev, zëvendëskryetari i Këshillit të Sigurisë në Rusi, ka paralajmëruar Ukrainën për një “ndëshkim të pashmangshëm” për vrasjen e gjeneralit të lartë rus, Igor Kirillov, i cili drejtonte forcat e mbrojtjes bërthamore, biologjike dhe kimike të Rusisë. Medvedev, një aleat i ngushtë i presidentit Vladimir Putin, bëri kërcënimin përmes një deklarate për agjencinë RIA Novosti, ku tha: “Udhëheqja ushtarako-politike e regjimit të Kievit do të përballet me një ndëshkim të pashmangshëm për vrasjen e Kirillov. Duke kuptuar pashmangshmërinë e disfatës së saj ushtarake, ajo ndërmerr sulme frikacake dhe të neveritshme në qytetet paqësore.”
Si ndodhi vrasja?
Një shpërthim i fuqishëm në Moskë këtë mëngjes ka rezultuar në vrasjen e gjeneralit Kirillov dhe ndihmësit të tij. Kirillov, i cili drejtonte forcat e mbrojtjes bërthamore, biologjike dhe kimike të Rusisë, u vra në juglindje të Moskës, rreth katër milje larg Kremlinit.
Mediat ruse raportojnë se pajisja shpërthyese ishte fshehur në një skuter dhe u aktivizua nga distanca, duke përmbajtur rreth 300 gramë lëndë shpërthyese. Një burim i shërbimeve të sigurisë ukrainase ka konfirmuar për Reuters se Kieci fshihet pas sulmit, ndërkohë që autoritetet ruse vijojnë punën për zbardhjen e ngjarjes.
Ukraina kishte hapur një hetim kundër Kirillovit për përdorimin e armëve kimike gjatë luftës në Ukrainë, ndërsa ai ishte sanksionuar nga Britania e Madhe për rolin e tij në përdorimin e këtyre armëve “barbare”.
Disa analistë kanë paralajmëruar se ky sulm mund të çojë në një përshkallëzim të mëtejshëm të tensioneve mes Rusisë dhe Ukrainës, ndërsa autoritetet ruse kanë bërë thirrje për hakmarrje dhe ndëshkim të atyre që janë përgjegjës për vrasjen.
j.l./ dita
