Tre platformat e META, Whatsapp dhe rrjetet sociale Instagram dhe Facebook kanë shfaqur probleme mbrëmjen e sotme. Shumë përdorues të rrjeteve sociale kanë raportuar se kishin vështirësi të dërgonin foto, video dhe audio.
Nga kontrollet e para duket, të paktën për Whatsapp-in, duket se problemet lidhen kryesisht me dërgimin e fotove apo audios, ndërkohë që mesazhet me tekst duket se funksionojnë. Por problemi mund të jetë i ndryshëm nga përdoruesi në përdorues. Meta Platforms tha se ishte në dijeni të problemeve.
“Ekipet tona inxhinierike janë në dijeni dhe po punojnë për zgjidhjen e problemit sa më shpejt të jetë e mundur”, tha Meta në faqen e saj të statusit.
Kjo është hera e dytë brenda këtij muaji që platformat e META shfaqin probleme, pasi e njëjta situatë ndodhi edhe më 6 qershor.
