Një ngjarje e rëndë është regjistruar mbrëmjen e djeshme në fshatin Kryekuq të Divjakës. • Një 32-vjeçar është goditur me thikë në një lokal ku për pasojë ka ndërruar jetë.
Viktima është identifikuar si Besmir Kumria.
Raportohet se autori Xhesion Toromeni është futur në lokalin ku ndodhi ngjarja dhe pastaj me thikë në dorë ka shkuar drejt tavolinës ku ndodhej Kumria.
Viktima ndodhej së bashku me persona të tjerë kur autori menjëherë e ka goditur me thikë.
Fatkeqësisht viktima nuk ka arritur t’iu mbijetojë plagëve. Autori mësohet se pas ngjarjes është arratisur dhe është kapur nga policia pas disa orësh.
Ai akuzohet për veprat penale “Vrasja me paramendim” dhe “Prodhimi dhe mbajtja pa leje e armëve të ftohta”.
Sipas Policisë, hetimet paraprake në lidhje me ngjarjen lidhen me debatet e vazhdueshme që kanë patur dy familjet e të rinjve për një kanal vaditës.
Njoftimi i policisë:
Divjakë/ Goditi me thikë një shtetas, i cili për pasojë humbi jetën; pas veprimeve të shpejta dhe profesionale të Policisë u identifikua dhe u vu në pranga autori i dyshuar. Pas vrasjes, autori u largua, por u kap pas disa orësh ndjekjeje nga shërbimet operacionale të DVP Fier.
Gjatë mesnatës, shërbimet e Komisariatit të Policisë Divjakë, pas marrjes së njoftimit se në fshatin Kryekuq një shtetas i paidentifikuar kishte hyrë në një lokal dhe kishte goditur me mjet prerës shtetasin B. K., 32 vjeç (i cili ishte në shoqërinë e miqve të tij), shkuan menjëherë në adresën e dhënë. U ngrit grup i posaçëm hetimor, në drejtimin e Prokurorisë, me qëllim zbardhjen e plotë të ngjarjes, identifikimin dhe kapjen e autorit.
Si rezultat i ndjekjes së pandërprerë nga forcat operacionale të DVP Fier, u bë e mundur kapja dhe shoqërimi në Polici i autorit të dyshuar, shtetasit Xh. T., 25 vjeç, banues në Kryekuq, i cili do të arrestohet për veprat penale “Vrasja me paramendim” dhe “Prodhimi dhe mbajtja pa leje e armëve të ftohta”.
Nga hetimet paraprake dyshohet se shtetasi Xh. T. e ka vrarë shtetasin B. K., pasi familjet e tyre kanë pasur konflikte të vazhdueshme për një kanal vaditës në fshat. Vijon puna për dokumentimin e plotë ligjor të ngjarjes.
j.l./ dita
