Në ditën e 31-të radhazi të Revolucionit ‘Flamingo’ protestuesit janë mbledhur fillimisht te Sheshi “Skënderbej” për t’iu drejtuar më pas godinës së Kryeministrisë.
Protesta pasoi incidentet e ndodhura paraditen e kësaj të marte, ku u ndaluan gjashtë protestues.
Një nga organizatorët, Arben Kola, ka akuzuar autoritetet se po synojnë përshkallëzimin e situatës.
“Këta kërkojnë dhunë, duan dhunë, jo protestë paqësore. Tani e tutje shqiptarët të reagojnë në mënyrë të pavarur, ne nuk mbajmë përgjegjësi”.
“Rama jep dorëheqjen, më mirë para se qytetarët t’ju marrin vërtet zvarrë e t’ju hedhin në kosh. Në PS e PD ka shumë të rinj që mund të qeverisin shumë më mirë se Rama dhe Saliu”, shtoi ai.
Gjithashtu ai paralajmëroi policinë të ketë kujdes. “Dhunës do i përgjigjemi me dhunë” – tha Kola.
Dritan Goxhaj njoftoi se arsyeja e shoqërimit ishte për kundërshtim të Policisë.
“Arsyeja e shoqërimit ishte pretendimi për kundërshtim të punonjësve të policisë, edhe pse ne nuk i kemi kundërshtuar. Ne kemi qenë gardh dhe u kemi bërë thirrje protestuesve të mos prekin punonjësit e policisë”, theksoi Goxhaj.
Ky i fundit shtoi se “trajtimi ndaj nesh ka qenë normal dhe nuk ka pasur asnjë problem”.
“Kanë ardhur disa deputetë dhe na kanë pyetur për situatën. Ne nuk pranuam të takonim Avokatin e Popullit, pasi për ne ai nuk përfaqëson popullin, sepse është votuar nga një Parlament që ne e konsiderojmë Parlament krimi. Për këtë arsye, ne kërkuam largimin e tij”, tha Goxhaj.
