Grup autorësh*
Gazeta “Kushtrim Brezash”, botim i Organizatës së Veteranëve dhe Pasardhësve të LANÇ të Popullit Shqiptar “Nderi i Kombit”, ka publikuar një informacion të deformuar, bashkëngjitur si foto, i cili bën me baltë edhe gazetën “Kushtrim Brezash”.
“Lajmi” përcillet me një lloj “triumfi” të “nënkryetarit” Idajet Beqiri, i cili përfaqësoi çështjen në gjyqin e datës 18.03.2025. Duket qartë që entuziazmi i “fitores” është personal. Në realitet, kërkesa jonë në Apel kishte për qëllim sigurimin e padisë për çështjen themelore dhe pezullimin nga funksionet drejtuese të z. Veli Myftari deri në zgjidhjen përfundimtare të çështjes.
Pra, ajo që u rrëzua ishte një kërkesë që synonte të ndalonte zhvillimin e konferencës së “organizuar” në kundërshtim me statutin – si nga pikëpamja ligjore e morale, ashtu edhe për shkak të shkeljes së afateve statutore për thirrjen e saj. Pranimi i kësaj kërkese do të lehtesonte punën për zgjidhjen e situatës së ndërlikuar që e kanë shkaktuar “drejtuesit” e paligjshëm.
Gjithsesi, taktikat e përdorura dhe propaganda disinformuese i shërben mbajtjes peng të Organizatës nga persona të palegjitimuar. “E suksesshme” për z. Idajet ka qenë shtyrja e këtij gjyqi tri herë, dmth edhe dy muaj më shumë, me qellim që të ngushtohej afati kohor për mbledhjen e konferencës.
Sepse me këtë konferencë duan të “legjitimohen” uzurpatorët (jo vetëm kryetari dhe sekretari, por edhe strukturat “statutore” të deformuara e me “anëtarësi” të kooptuar).
Siç jeni në dijeni, e kemi bërë publike një deklaratë ku kemi shpjeguar pse kjo konferencë është e paligjshme dhe në shkelje të Statutit. Gjithsesi le të ritheksojmë:
Pse nxituan të thërresin mbledhjen e Konferencën e 13 Kombëtare 20 muaj para se të mbaronte mandati i Konferencës së 12? Sigurisht jo për forcimin e Organizatës, por për “shtrirjen” e rrenjëve të uzurpuesve në të gjithë territorin e jo vetëm në krye.
Me këtë “konferencë” duken qartë synimet e tyre ogurzeza: të zerojnë dy vendimet që ka marrë Gjykata e Shkallës së Parë, si atë me nr.1549/4 të datës 30.06.2023, që ata e humbën dhe e kanë apeluar ashtu edhe Vendimin me me nr. 1549/5, datë 10.10.2024, të cilin ata vetë e kanë apeluar.
Për të dy këto ankime, Apeli ende nuk ka caktuar data dhe, kuptohet, nuk janë shqyrtuar kërkesat. Dmth ende nuk ka vendime të formës së prerë.
Madje, siç jeni në dijeni, z. Veli Myftari është çrregjistruar nga regjistri i anëtarësisë dhe është përjashtuar si anëtar me vendimin e mbledhjes së datës 04.12.2024 të Organizatës së Veteranëve dhe Pasardhësve nr. 29/1 të Këshillit Zonal 5/1 Tiranë, vendim i cili është dorëzuar në administratën e Komitetit Kombëtar me nr. 236 protokolli. Duke mos qenë as anëtar ai nuk mund të jetë drejtues!
Edhe njëherë sqarojmë se në kërkesën për sigurim padije dhe pezullimin e Veli Myftarit nga detyra, nuk synonim të dublonim as vendimin e gjykatës e as vendimin e Organizatës. Përkundrazi. Z. Veli duhej të hiqej mënjanë dhe t’i hapte rrugën drejtësisë e të mos lodhte më shumë “avokatin” të gjente pretekste për zvarritje e pengmarrje të organizimit e funksionimit të kësaj vlere kombetare.
Ashtu si percolli nje “lajm” te deformuar, gazeta “Kushtrim Brezash” do të duhej të kishte publikuar edhe vendimet gjyqësore të sipërcituara. Kjo gazetë si organ zedhenes i nje organizate kulturore historike atdhetare duhet te jete transparente, e detyruar për të informuar lexuesit e saj abonentë.
Po i ricitojmë:
1. Vendimin e datës 30.06.2023, i cili refuzoi kërkesën e përgatitur nga ekipi mbeshtetes përgjegjësive regjistrimin e z. Hulusi Hako si “kryetar”.
2. Vendimin e datës 10.10.2024, që pranoi padinë tonë në të gjitha pikat, duke rrëzuar vendimin e datës 02.02.2023— mbi bazën e dosjes se pergatitur nga “ekipi” qe kishte shkelje statutore, ligjore dhe procedurale, madje edhe me falsifikime e të pavërteta.
Gjithsesi sqarojmë se në seancën gjyqësore të datës 18.03.25 u rrëzua vetëm një kërkesë procedurale, por jo çështja gjyqësore në themel.
Të dyja këto vendime janë ende në fuqi, edhe pse janë apeluar nga z. Hulusi Hako dhe z. Veli Myftari me mbrojtjen e z. Idajet Beqiri. Ndërkohë, vendimi i fundit për rrëzimin e kërkesës sonë ende nuk është printuar me arsyetimin përkatës.
E vlerësojmë maksimalisht inkurajimin nga drejtues të bazës, komitete të veteranëve dhe anëtarë të organizatës në të gjithë vendin, të cilët ashtu si edhe ne, nuk mund të pranojnë padrejtësinë që po i bëhet Organizatës sonë. Me vendosmërinë, përkushtimin dhe korrektësinë tonë, nuk duam t’i zhgënjejmë. Përkundrazi, jemi të vendosur të ndjekim rrugën ligjore me besim në drejtësi!
Bashkërisht do të përdorim mundësitë që ofron ligji, statuti, si rrugë të drejta që dëshmojnë qytetari për të rikthyer në identitetin e saj Organizatën e Veteranëve dhe Pasardhësve të LANÇ të Popullit Shqiptar “Nderi i Kombit”.
Përfaqësues me prokurë për ndjekjen e çështjes gjyqësore
Elidiana Canaj,
Manthos Dardaj,
Pelivan Hysi
