Pas Covid-19, një tjetër kërcënim shëndetësor shfaqet në horizont. OBSH shpalli linë e majmunit si emergjencë globale të shëndetit publik, për herë të dytë në 2 vite, pas një shpërthimi të infeksionit viral në Republikën Demokratike të Kongos, që është përhapur edhe në vendet fqinje.
Një komision për emergjencat u takua gjatë së mërkurës për të këshilluar kreun e Organizatës Botërore të Shëndetësisë (OBSH), Tedros Adhanom Ghebreyesus, nëse përhapja e sëmundjes përbën një emergjencë publike globale. Ky status përfaqëson nivelin më të lartë të alarmit dhe synon të përshpejtojë kërkimet, financimin, masat parandaluese dhe bashkëpunimin për të frenuar përhapjen e sëmundjes.
“Është e qartë se një përgjigje e koordinuar ndërkombëtare është thelbësore për të frenuar përhapjen dhe për të shpëtuar jetë njerëzish”, tha kreu i OBSH.
Lija e majmunit mund të përhapet përmes kontaktit të ngushtë. Zakonisht ka simptoma të lehta, por në raste të rralla mund të rezultojë fatale. Shkakton simptoma të ngjashme me gripin dhe puçrra të mbushura me qelb në trup. Një variant i ri i lisë po përhapet më lehtësisht përmes kontaktit të gushtë, përfshirë marrëdhëniet seksuale. Ai është përhapur nga Kongo në vendet fqinje, të tilla si Burundi, Kenya, Ruanda dhe Uganda. Ghebreyesus tha se OBSH-ja kishte autorizuar 1,5 milionë dollarë fonde emergjente dhe planifikon të autorizojë më shumë në ditët në vijim.
Në fillim të kësaj jave, organi më i lartë i shëndetit publik i Afrikës e shpalli linë e majmunit emergjencë për kontinentin, pasi paralajmëroi se infeksioni viral po përhapej në një shkallë alarmante, me më shumë se 17 000 raste të dyshuara dhe më shumë se 500 vdekje këtë vit, kryesisht midis fëmijëve në Kongo.
j.l./ dita
