Shefi i Agjencisë për Refugjatë të Kombeve të Bashkuara, Filippo Grandi, ka bërë thirrje për më shumë mbështetje ndërkombëtare për Sirinë, me qëllim që të përshpejtohet rindërtimi dhe të mundësohet kthimi i mëtejmë i refugjatëve, pas afër 14 vjetësh luftë civile.
Sirianët që ishin zhvendosur brenda vendit ose kishin ikur jashtë, kanë filluar gradualisht të kthehen në shtëpitë e tyre që nga dhjetori, kur u rrëzua nga pushteti Bashar al-Assadi, i cili me shtypjen brutale të protestave paqësore kundër qeverisë në vitin 2011 kishte shkaktuar luftën civile.
Megjithatë, shkatërrimi në shkallë të gjerë, përfshirë edhe infrastrukturën bazë, vazhdon të jetë një pengesë e madhe për kthimin e sirianëve.
Grandi tha se mbi 2 milionë njerëz janë kthyer në zonat e tyre të origjinës, përfshirë rreth 1.5 milionë të zhvendosur brenda vendit, ndërsa rreth 600 mijë të tjerë janë kthyer nga vendet fqinje si Libani, Jordania dhe Turqia.
“Dy milionë, sigurisht, janë vetëm një pjesë e vogël e numrit shumë të madh të refugjatëve dhe të zhvendosurve sirianë, por është një shifër shumë e madhe”, tha ai.
Sipas UNHCR-së, afër 13.5 milionë sirianë vazhdojnë të jenë të zhvendosur brenda dhe jashtë vendit.
Konflikti në Siri zhvendosi rreth gjysmën e popullsisë para luftës, me shumë të zhvendosur brenda vendit që kërkuan strehim në kampet në veriperëndim të vendit.
Grandi tha se pas rrëzimit të Assadit, pengesa kryesore për kthimin e njerëzve ishte “mungesa e shërbimeve, mungesa e strehimit, mungesa e punës”, duke shtuar se agjencia e tij po punon me autoritetet siriane dhe qeveritë rajonale “për të ndihmuar njerëzit të kthehen”.
Me heqjen e sanksioneve perëndimore, autoritetet e reja siriane po shpresojnë për mbështetje ndërkombëtare për të nisur përpjekjet për rindërtimin e vendit. OKB-ja ka vlerësuar se për rindërtimin e Sirisë do të nevojiten më shumë se 400 miliardë dollarë./REL
A politik kurve à.
Po populli i heq te keqet e kesaj politike.