Papa Françesku u shfaq pak pas mesditës nga ballkoni qendror i Bazilikës së Shën Pjetrit për bekimin “Urbi et Orbi”, për qytetin dhe botën, në përfundim të Meshës së Pashkës.
“Pashkët janë festa e jetës! Zoti na ka krijuar për jetën dhe dëshiron që njerëzimi të ringjallet! Në sytë e Tij çdo jetë është e çmuar! Qoftë ajo e fëmijës në barkun e nënës së vet, ashtu edhe ajo e të moshuarve apo të sëmurëve, që në një numër gjithnjë e më të madh vendesh konsiderohen si njerëz të hedhur tej.
Sa shumë vullnet për vdekje shohim çdo ditë në konfliktet e shumta që përfshijnë pjesë të ndryshme të botës! Sa shumë dhunë shohim shpesh edhe brenda familjeve, ndaj grave apo fëmijëve! Sa përçmim ushqehet ndonjëherë ndaj më të dobëtëve, të përjashtuarve, migrantëve”, tha Papa duke ia lënë leximin e mesazhit të bekimit “Urbi et Orbi” mjeshtrit të ceremonive liturgjike, imzot Diego Ravelli.
Në mesazhin “Urbi et Orbi”, si zakonisht, Papa përshkon me vështrim shumë zona krize në botë, duke shprehur shpresën për një “marrëveshje paqeje” mes Armenisë dhe Azerbajxhanit, “vullnete pajtimi” në Ballkanin Perëndimor, si edhe paqe dhe fund të dhunës në Republikën Demokratike të Kongos, në Sudan dhe Sudanin e Jugut, në Sahel, në Bririn e Afrikës dhe në Rajonin e Liqeneve të Mëdha dhe luftërat në Lindjen e Mesme dhe Ukrainë.
Ati i shenjtë këtë mëngjes, në orën 11:30, priti në rezidencën e tij në Shtëpinë e Shën Martës nënkryetarin e Shteteve të Bashkuara të Amerikës, J.D. Vance, për një “takim privat të shkurtër”, konfirmoi salla e shtypit e Vatikanit.
“Takimi, që zgjati disa minuta, shërbeu për të shkëmbyer urimet në ditën e Pashkës”, njoftoi Vatikani.
I kthyer në Vatikan nga spitali Gemelli më pak se një muaj më parë, më 23 mars, Papa ndodhet ende nën kujdes nga mjekët. Megjithatë, edhe pse me vështirësi në lëvizje dhe në të folur, ai është shfaqur disa herë në publik gjatë Javës së Shenjtë. Më së fundi dje pasdite, disa orë para Meshës së Vigjiljes së Pashkës.
j.l./ dita
