Papa Leo XIV ka njoftuar se do t’i nënshtrohet një ndërhyrjeje kirurgjikale në ditët në vijim, pasi gjatë një kontrolli mjekësor iu zbulua një masë në mushkëri.
Ati i Shenjtë, 71 vjeç, bëri të ditur gjatë lutjes së së dielës në Sheshin e Shën Pjetrit në Romë se mjekët e kanë identifikuar masën në një fazë të hershme dhe se ajo është e lokalizuar.
Sipas Papës, ekipi mjekësor vlerëson se ndërhyrja është e nevojshme, ndërsa ai ka pranuar rekomandimin e mjekëve.
Zëdhënësi i Zyrës së Shtypit të Selisë së Shenjtë, Matteo Bruni, bëri të ditur se operacioni është planifikuar për ditët e para të javës së ardhshme. Pas ndërhyrjes, Papa pritet të ketë një periudhë rikuperimi prej rreth një jave.
Sipas Vatican News, operacioni do të kryhet në spitalin Gemelli në Romë, ku prej vitesh ekziston një suitë e posaçme për Papën.
Papa Leo XIV, emri i lindjes i të cilit është Robert Francis Prevost, u zgjodh në krye të Kishës Katolike në vitin 2025, pas vdekjes së Papa Françeskut.
Ai është Papa i 267-të dhe i pari me origjinë amerikane. Përpara zgjedhjes, ai shërbeu për shumë vite si misionar në Peru, ku u angazhua në mbështetje të komuniteteve të margjinalizuara.
j.l./ dita
